اقتاۋدا كاسىپكەر ساۋدا نۇكتەسىنىڭ اشىلۋىنا وراي بالالارعا تەگىن بالمۇزداق پەن يوگۋرت ۇلەستىرگەنى ءۇشىن ايىپپۇل تولەدى، دەپ حابارلايدى infohub.kz سايتى.
وقيعا 1 تامىزدا 14 شاعىن اۋدانىندا بولدى. كاسىپكەر 50 پورسيا بالمۇزداق پەن 30 يوگۋرت تاراتقان. اكسيادان كەيىن نىسان يەسى اكىمشىلىك جاۋاپكەرشىلىككە تارتىلىپ، 20 اەك مولشەرىندە ايىپپۇل سالىندى، بۇل 86 500 تەڭگەنى قۇرايدى.
قالالىق اكىمدىك مۇنداي باستامالارعا قارسى ەمەس ەكەنىن ايتىپ، زاڭ تالاپتارىن ساقتاۋ قاجەتتىگىن اتاپ ءوتتى. "ءبىز كاسىپكەرلەردىڭ بۇل باعىتتاعى باستامالارىنا قارسى ەمەسپىز. الايدا ءونىمدى تەگىن تاراتۋ قولدانىستاعى زاڭناما تالاپتارىن ساقتاي وتىرىپ جۇرگىزىلۋى ءتيىس"، - دەدى اكىمدىكتە.
ۆەدومستۆو مۇنداي ءىس-شارالاردى وتكىزۋ الدىندا جەرگىلىكتى اتقارۋشى ورگاننان رۇقسات الۋ قاجەتتىگىن ءتۇسىندىردى. "وسىنداي ءىس-شارالاردى ۇيىمداستىرۋ الدىندا جەرگىلىكتى اتقارۋشى ورگاننان ءتيىستى رۇقسات الۋ، سونداي-اق بالالاردى قۋانتۋدىڭ باسقا دا ءقاۋىپسىز جانە زاڭدى جولدارىن قاراستىرۋ قاجەت. مۇنداي اكسيالار كەزىندە ادامداردىڭ كوپ جينالۋى ءارتۇرلى جاعىمسىز جاعدايلارعا اكەلۋى مۇمكىن"، - دەپ قوستى اكىمدىك.
جاريالانىمدا مۇنداي اكسيالاردىڭ بۇرىن دا ابىر-سابىرعا اكەلگەنى ەسكە سالىندى. ماسەلەن، بىلتىرعى 1 ماۋسىمدا اقتاۋداعى تولقىن-1 شاعىن اۋدانىندا بالمۇزداق پەن ماقتا كامپيتىن تەگىن تاراتۋ ابىر-سابىر تۋدىرعان ەدى.
بۇعان دەيىن اقتاۋدا كاسىپكەردىڭ اكىمدىك رۇقساتىنسىز جاپپاي ءىس-شارا كەزىندە گۇلدەردى تەگىن تاراتقانى ءۇشىن ايىپپۇل العانى حابارلانعان بولاتىن.