اقتاۋدا بالا قايتىس بولعان سوڭ بالالار حيرۋرگى قاماۋعا الىندى. ماڭعىستاۋ وبلىسى پوليسيا دەپارتامەنتى دارىگەردىڭ ۇستالۋىنا رەسمي تۇسىنىكتەمە بەردى. مەديكتى كاسىبي مىندەتتەرىن تيىسىنشە ورىندامادى دەپ كۇدىكتەنىپ وتىر، دەپ حابارلايدى infohub.kz سايتى.
پوليسيا دەرەگىنشە، وبلىستىق اۋرۋحانا دارىگەرلەرى بالانى دياگنوستيكالاۋ مەن ەمدەۋ كەزىندە قاتەلىك جىبەرگەن. ناۋقاستىڭ جاعدايى كۇرت ناشارلاعان سوڭ ول ساناۆياسيامەن الماتىعا جەدەل جەتكىزىلدى. الايدا دارىگەرلەردىڭ ارەكەتىنە قاراماستان بالانى امان الىپ قالۋ مۇمكىن بولمادى — ول اۋرۋحانادا كوز جۇمدى.
«كوميسسيالىق سوت-مەديسينالىق ساراپتاما قورىتىندىسىنا سايكەس، كامەلەتكە تولماعان بالاعا مەديسينالىق كومەك كورسەتۋ بارىسىندا اسقىنۋلاردىڭ دامۋىنا ىقپال ەتۋى مۇمكىن كەمشىلىكتەر انىقتالدى»، — دەپ كەلتىرەدى باسىلىم پوليسيانىڭ جاۋابىن.
پوليسيادا سوتقا دەيىنگى تەرگەۋ جالعاسىپ جاتقانىن، بولعان وقيعانىڭ بارلىق ءمان-جايىن انىقتاۋ ءۇشىن شارالار كەشەنى جۇرگىزىلىپ جاتقانىن ءتۇسىندىردى.
سونىمەن قاتار ماڭعىستاۋ كوپبەيىندى اۋرۋحاناسى ديرەكتورىنىڭ ورىنباسارى ءۇمىت ءىلياسوۆا ۇستالعان حيرۋرگتى قولداپ شىقتى. بۇل تۋرالى ول Facebook-تەگى پاراقشاسىندا دەنساۋلىق ساقتاۋ مينيسترلىگى مەن ىشكى ىستەر مينيسترلىگىنە جولداعان ۇندەۋىندە جازدى.
«مىڭداعان بالانى امان الىپ قالعان بالالار حيرۋرگى ۇستالدى. ارىپتەستەردىڭ ايتۋىنشا، تاعى باسقالارىن دا ۇستاماق. ماڭعىستاۋ وبلىسىندا قايتادان قۇقىقتىق وزبىرلىق بەلەڭ الىپ تۇر. ايعاق بەرۋگە شاقىرعان بولىپ، ۇستاپ كەتتى، ادۆوكاتىمىزعا حابارلامادى. ۇستاۋعا ەشقانداي نەگىز جوق»، — دەپ جازدى ول.
حيرۋرگ بەيسەنبىدە، 1 قازاندا، قازاقستان رەسپۋبليكاسى قىلمىستىق كودەكسىنىڭ 128-بابى (ۇستاۋ نەگىزدەرى) بويىنشا ۇستالعانى حابارلاندى. ءقازىر دارىگەر تەرگەۋ يزولياتورىندا وتىر.