ماڭعىستاۋ وبلىسىندا ءتورت ادامنىڭ ءومىرىن قيعان جول-كولىك وقيعاسى بولدى. وقيعا فاكتىسى بويىنشا قىلمىستىق ءىس قوزعالدى، دەپ حابارلايدى infohub.kz سايتى.
ماڭعىستاۋ وبلىستىق پوليسيا دەپارتامەنتىنىڭ ءباسپاسوز قىزمەتى ناقتىلاعانداي، قايعىلى وقيعا 16 قىركۇيەكتە ساعات 20:30 شاماسىندا رەسپۋبليكالىق ماڭىزى بار اقتاۋ — بەينەۋ اۆتوجولىندا بولعان. اپاتقا ەكى Toyota Camry ماركالى كولىك قاتىسقان.
«الدىن الا دەرەكتەر بويىنشا، جەتىباي اۋىلىنان شەتپە اۋىلىنا قاراي كەلە جاتقان Toyota Camry جۇرگىزۋشىسى ءجۇرىس بولىگىندە تۇرعان تۇيەگە سوقتىعىسقان. سوقتىعىستان كەيىن كولىك قارسى جولاققا شىعىپ، قارسى باعىتتا كەلە جاتقان Toyota Camry-مەن سوقتىعىسقان»، — دەدى ماڭعىستاۋ وبلىستىق پوليسيا دەپارتامەنتىندە.
جول-كولىك وقيعاسى سالدارىنان ءتورت ادام العان جاراقاتتارىنان وقيعا ورنىندا قازا تاپتى. تاعى ءتورت ادام ءتۇرلى جاراقاتپەن مەديسينالىق مەكەمەگە جەتكىزىلدى.
وسى فاكتى بويىنشا قازاقستان رەسپۋبليكاسى قىلمىستىق كودەكسىنىڭ 345-بابىنىڭ 4-بولىگىمەن قىلمىستىق ءىس قوزعالدى. كولىك قۇرالدارى ارنايى تۇراققا قويىلدى. قاجەتتى ساراپتامالار تاعايىندالدى.
تەرگەۋ جالعاسۋدا. وقيعانىڭ بارلىق ءمان-جايى، ونىڭ ىشىندە جانۋاردىڭ يەسى انىقتالۋدا.