اقتاۋدا "Sax Invest" قارجى پيراميداسىن قۇرۋعا جانە وعان باسشىلىق ەتۋگە قاتىستى ۇيىمداسقان قىلمىستىق توپتىڭ سەگىز مۇشەسىنە ۇكىم شىعارىلدى، دەپ حابارلايدى infohub.kz سايتى.
قارجىلىق مونيتورينگ اگەنتتىگىنىڭ مالىمەتىنشە، ۇيىمداستىرۋشىلار ينۆەستيسيالىق قور رەتىندە باعالى قاعازدارعا، قارجى قۇرالدارىنا جانە باسقا دا اكتيۆتەرگە سالىم ۇسىنىپ، سونىمەن قاتار افريكا ەلدەرىندە الماز ءوندىرۋ جونىندەگى حالىقارالىق جوباعا قاتىساتىندارىن مالىمدەگەن. 2018-2022 جىلدار ارالىعىندا قىلمىستىق سحەماعا استانا، اقتوبە، ورال جانە اقتاۋدان مىڭنان استام سالىمشى تارتىلعان. تارتىلعان قاراجاتتىڭ جالپى سوماسى 9 ميلليارد تەڭگەدەن استى.
«تەرگەۋ بارىسىندا سالىمداردىڭ ەداۋىر بولىگى كومپانيا شوتتارىنا ەمەس، ۇيىمداستىرۋشىلاردىڭ جەكە شوتتارىنا اۋدارىلعانى انىقتالدى. كەيىن بۇل اقشا جەكە ماقساتتارعا، ونىڭ ىشىندە قۇمار ويىندارعا، پاتەر ساتىپ الۋعا، جەكە ءۇي سالۋعا جانە باسقا دا قاجەتتىلىكتەرگە جۇمسالدى»، – دەدى ۆەدومستۆودا.
سوت ۇيىمداسقان توپتىڭ سەگىز مۇشەسىن كىنالى دەپ تانىپ، ولاردى 6-7 جىلعا باس بوستاندىعىنان ايىرۋ جازاسىنا كەستى. مەملەكەت كىرىسىنە جەكە ءۇي مەن سيفرلىق اكتيۆتەر تاركىلەندى. سونداي-اق ازاماتتىق تالاپتاردىڭ ورىندالۋىن قامتاماسىز ەتۋ ءۇشىن سوتتالۋشىلاردىڭ ەكى اۆتوكولىك، ەكى پاتەر جانە جەر تەلىمى سىندى مۇلكىنە سالىنعان تىيىم ساقتالادى. ۇكىم زاڭدى كۇشىنە ەنگەن جوق.
ەسكە سالايىق، 2024 جىلدىڭ قاراشاسىندا ماڭعىستاۋ وبلىسى بويىنشا قما دەپارتامەنتى «Sax Invest» قارجى پيراميداسىنىڭ قۇرىلىمدىق بولىمشەسىن باسقارعان ءبىر توپ ادامعا قاتىستى سوتقا دەيىنگى تەرگەۋ جۇرگىزگەن. 2018-2022 جىلدارى پيراميدا سالىمشىلارى 1000 ادامنان اسقانى ايتىلدى.