اقتاۋدا كاسپي تەڭىزى جاعالاۋىندا قازاقستان رەسپۋبليكاسى قارۋلى كۇشتەرىنىڭ اسكەري-تەڭىز كۇشتەرى وقۋ-جاتتىعۋى كەزىندە قازا تاپقان اسكەري قىزمەتشىلەردىڭ تۋىستارى قالالىق ءمايىتحاناعا كەلىپ، مايىتتەردى انىقتاۋدى تالاپ ەتتى. وقيعا ورنىنان تۇسىرىلگەن كادرلاردى اقتاۋلىق بلوگەر ازامات سارسەنبايەۆ جاريالادى، دەپ حابارلايدى infohub.kz سايتى.
بلوگەر Instagram پاراقشاسىندا اقتاۋ قالالىق ءمايىتحاناسىنىڭ جانىندا ءقازىر بولىپ جاتقان جاعدايدى كورسەتتى.
«جۇزدەگەن ادام، تۋىستار مەن جاقىندار ءمايىتحانا كىرەبەرىسىنىڭ الدىنا جينالىپ، ساربازداردىڭ مايىتتەرىن انىقتاۋدى تالاپ ەتۋدە. قازىرگى تاڭدا جەرگىلىكتى بيلىك وكىلدەرى قازا تاپقان ساربازداردىڭ مايىتتەرىن تۇرعىلىقتى جەرىنە جەتكىزۋگە دايىندىق جۇرگىزۋدە (مايىتتەردى ءمايىتحانادا تىكەلەي بەرمەيدى). ماڭعىستاۋ وبلىسى اكىمىنىڭ ورىنباسارى عالىمجان نيازوۆتىڭ ۋادە ەتۋىنشە، ساربازداردىڭ مايىتتەرى تۋىستارىنا تۇرعىلىقتى جەرىنە قىسقا مەرزىمدە جەتكىزىلىپ بەرىلەدى»، — دەلىنگەن حابارلامادا.
قايعىلى وقيعا 24 قىركۇيەكتە ماڭعىستاۋ وبلىسىندا بولدى. قازاقستان رەسپۋبليكاسى قارۋلى كۇشتەرىنىڭ اسكەري-تەڭىز كۇشتەرىنىڭ وقۋ-جاتتىعۋى بارىسىندا وقۋ-جاۋىنگەرلىك مىندەتتى ورىنداۋ كەزىندە كاسپي تەڭىزىنىڭ جاعالاۋىندا مەتەورولوگيالىق جاعدايدىڭ كۇرت ناشارلاۋى مەن جەلدىڭ كۇشەيۋى سالدارىنان اسكەري قىزمەتشىلەر تەڭىزگە اعىزىلىپ كەتتى.
قورعانىس مينيسترلىگىنىڭ الدىن الا مالىمەتىنشە، تەڭىزگە 19 اسكەري قىزمەتشى اعىزىلىپ كەتكەن. قازىرگى ۋاقىتتا 9 اسكەري قىزمەتشىنىڭ قازا تاپقانى تىركەلدى. باس پروكۋراتۋرا اقتاۋ گارنيزونىندا قىلمىستىق ءىس قوزعالىپ، تەرگەلىپ جاتقانىن حابارلادى.
اسكەري قىزمەتشىلەردىڭ قازا تابۋىنان كەيىن ۇكىمەتتىك كوميسسيا قۇرىلىپ، توتەنشە وقيعا ورنىنا پرەمەر-مينيستردىڭ ورىنباسارى قانات بوزىمبايەۆ جىبەرىلدى. قازاقستان پرەزيدەنتى قاسىم-جومارت توقايەۆ ماڭعىستاۋ وبلىسىندا اسكەري قىزمەتشىلەردىڭ قازا تابۋىنا بايلانىستى كوڭىل ايتىپ، قايعىلى وقيعانى تەرگەۋ جونىندە تاپسىرمالار بەردى.
اقتاۋدا قالا كۇنىنە وراي مەرەكەلىك ءىس-شارالار توقتاتىلدى. قاسىم-جومارت توقايەۆ 25 قىركۇيەكتى قازاقستاندا جالپىۇلتتىق ازا تۇتۋ كۇنى دەپ جاريالادى.
24 قىركۇيەك كەشىندە پرەمەر-مينيستردىڭ ورىنباسارى قانات بوزىمباەۆتىڭ باسشىلىعىمەن كوميسسيا ماڭعىستاۋ وبلىسىنا كەلدى.