اقتاۋ تۇرعىنى ليپوساكسيادان كەيىن تۋىنداعان اۋىر اسقىنۋلارعا بايلانىستى سوتقا جۇگىندى. تەكسەرۋ بارىسىندا كلينيكادا ءبىرقاتار بۇزۋشىلىقتار انىقتالدى، دەپ حابارلايدى infohub.kz.
اقتاۋ تۇرعىنى جەكە كلينيكادا جاسالعان ليپوساكسيادان كەيىن ازاماتتىق تالاپ-ارىزبەن سوتقا جۇگىندى. مەديسينالىق جانە فارماسەۆتيكالىق باقىلاۋ كوميتەتىنىڭ اۋماقتىق دەپارتامەنتى جۇرگىزگەن تەكسەرۋ ءبىرقاتار بۇزۋشىلىقتاردى، ونىڭ ىشىندە حيرۋرگيالىق وپەراسيالاردى جۇرگىزۋگە ليسەنزيانىڭ جوقتىعىن انىقتادى.
جوسپاردان تىس تەكسەرۋ ناتيجەلەرىن ماڭعىستاۋ وبلىسى بويىنشا مەديسينالىق جانە فارماسەۆتيكالىق باقىلاۋ كوميتەتى دەپارتامەنتىنىڭ باسشىسى نۇرسۇلۋ مۇحامبەتياروۆا جاريا ەتتى.
«تەكسەرۋ ناتيجەلەرى بويىنشا ءبىرقاتار بۇزۋشىلىقتار انىقتالدى — حيرۋرگيالىق كومەك ستاندارتتارىن ساقتاماۋ، ليسەنزيالاۋ نورمالارىن بۇزۋ جانە مەرزىمى وتكەن دارىلىك زاتتاردى قولدانۋ. تەكسەرۋ كەزىندە كلينيكادا جارامدىلىق مەرزىمى ساۋىردە اياقتالعان دارىلەردىڭ بولۋى انىقتالدى. بۇزۋشىلىقتاردى جويۋ ءۇشىن ءبىر اي مەرزىم بەرىلدى»، — دەدى نۇرسۇلۋ مۇحامبەتياروۆا.
تەكسەرۋ قورىتىندىسى بويىنشا مەديسينالىق مەكەمە باسشىلىعىنا ليسەنزيالاۋ نورمالارىن بۇزعانى، مەديسينالىق كومەك كورسەتۋ ستاندارتتارىن ساقتاماعانى جانە فارماسەۆتيكالىق قىزمەت ەرەجەلەرىن بۇزعانى ءۇشىن اكىمشىلىك حاتتامالار جاسالدى. ايىپپۇلداردىڭ جالپى سوماسى شامامەن 700 مىڭ تەڭگەنى قۇرادى.
دەپارتامەنت باسشىسىنىڭ تۇسىندىرۋىنشە، كلينيكانىڭ پلاستيكالىق حيرۋرگيا سالاسىندا تەك امبۋلاتوريالىق-ەمحانالىق كومەككە ليسەنزياسى بولعان. بۇل كونسۋلتاسيالار وتكىزۋگە مۇمكىندىك بەرگەن، الايدا حيرۋرگيالىق وپەراسيالاردى جاساۋعا قۇقىق بەرمەگەن.
«كلينيكادا „ەرەسەك تۇرعىندارعا ستاسيوناردى الماستىراتىن مەديسينالىق كومەك — پلاستيكالىق حيرۋرگيا“ بەيىنى بويىنشا مەديسينالىق قىزمەتتى جۇزەگە اسىرۋعا ليسەنزياعا قوسىمشا جوق. مەديسينالىق قۇجاتتاماعا، مامانداردىڭ تۇسىنىكتەمەلەرىنە جانە جوسپاردان تىس تەكسەرۋگە تارتىلعان تاۋەلسىز ساراپشىنىڭ قورىتىندىسىنا سايكەس، كورسەتىلگەن مەديسينالىق كومەك قازاقستان رەسپۋبليكاسىنىڭ قولدانىستاعى حيرۋرگيالىق جانە انەستەزيولوگيالىق كومەك ستاندارتتارىنا سايكەس كەلمەگەن. حيرۋرگيالىق تەحنيكانىڭ تومەن ساپاسى مەن وپەراسيادان كەيىنگى كۇتىمنىڭ جەتكىلىكسىزدىگى اسقىنۋدىڭ — ءىش الدىڭعى قابىرعاسىنىڭ فلەگموناسىنىڭ دامۋىمەن تىكەلەي سەبەپ-سالدارلىق بايلانىستا ەكەنى انىقتالدى»، — دەلىنگەن پاسيەنت كاميلا نۇرجان بولىسكەن تەكسەرۋ ماتەريالدارىندا.
تەكسەرۋ اكتىسى قۇقىقتىق باعالاۋ ءۇشىن ماڭعىستاۋ وبلىسىنىڭ پوليسيا دەپارتامەنتىنە جىبەرىلدى. سونىمەن قاتار، قۇجات وپەراسيالىق بلوك پەن رەانيماسيا بولىمشەسىنىڭ سانيتارلىق تالاپتارعا سايكەستىگىن تەكسەرۋ ءۇشىن سانيتارلىق-ەپيدەميولوگيالىق باقىلاۋ دەپارتامەنتىنە بەرىلدى.
كاميلا نۇرجاننىڭ ءوزى پوليسياعا جۇگىنىپ، ماتەريالدىق جانە مورالدىق زياندى وتەۋدى تالاپ ەتىپ، ازاماتتىق تالاپ-ارىز بەرگەنىن حابارلادى.
«ءقازىر ەمدەلۋ مەن قالپىنا كەلۋدى جالعاستىرىپ جاتىرمىن. وپەراسيا مەن اۋىر قابىنۋ پروسەسىنەن كەيىن اعزا قاتتى السىرەدى، گەموگلوبين دەڭگەيى 83 بىرلىككە دەيىن تومەندەدى. تاعايىندالعان ەمدى قابىلداپ، قان كورسەتكىشتەرىن قالپىنا كەلتىرىپ، دارىگەرلەردىڭ باقىلاۋىندامىن. وپەراسيانىڭ سالدارى ءالى دە بايقالادى، سوندىقتان قالپىنا كەلۋ پروسەسى ءالى اياقتالعان جوق. كورىنەتىن تىرتىقتار قالدى، ءىرىڭ ءالى دە بار. ال كلينيكا Instagram اككاۋنتىن اۋىستىرىپ، جۇمىسىن جالعاستىرۋدا»، — دەدى ول.
بۇعان دەيىن كاميلا نۇرجان اقتاۋداعى جەكە كلينيكالاردىڭ بىرىندە ليپوساكسيادان كەيىن اۋىر ءىرىڭدى قابىنۋمەن شۇعىل تۇردە اۋرۋحاناعا جات قىزىلعانىن مالىمدەگەن.