اكتاۋدا ەمدەلۋشىلەرگە قازاقستاندا تىركەلمەگەن دارىلەردى ەگىپ كەلگەن مەديسينالىق ورتالىقتىڭ قىزمەتى توقتاتىلدى. جوسپاردان تىس تەكسەرۋ كەزىندە كۇماندى قۇرامداعى ساۋىقتىرۋ تامشىلاتقىشتارى انىقتالدى. ماماندار 240-قا جۋىق دارىلىك زاتتى تاركىلەدى، دەپ حابارلايدى inbusiness.kz.
تەكسەرۋگە سەبەپ بولعان – وبلىستىق فارماسەۆتيكالىق باقىلاۋ دەپارتامەنتىنە ءبىر ايەلدىڭ شاعىمى. ءبىر پروسەدۋرادان كەيىن ول ناتيجەگە كوڭىلى تولماي، اقشانى قايتارۋدى تالاپ ەتكەن، ءبىراق باس تارتىلعان. تەكسەرۋ بارىسىندا ەكى پروسەدۋرالىق كابينەتتە ەمدەلۋشىلەرگە مەملەكەتتىك تىركەۋدەن وتپەگەن، ساپا مەن قاۋىپسىزدىك سەرتيفيكاتتارى جوق دارىلەرمەن ساۋىقتىرۋ جانە جاسارۋ تامشىلاتقىشتارى جاسالعانى انىقتالدى. سوت مەديسينالىق مەكەمەگە 600 مىڭ تەڭگەدەن استام ايىپپۇل سالىپ، قىزمەتىن ءبىر ايعا توقتاتتى.
«ۇيىم سۇلۋلىق سالونى رەتىندە جۇمىس ىستەپ، دەنساۋلىقتى نىعايتۋ قىزمەتىن جارنامالاعان. اتالعان مەكەمەدەگى مەديسينا قىزمەتكەرلەرى ليسەنزياسىز جۇمىس ىستەگەن. وسىعان بايلانىستى دەپارتامەنت قوسىمشا اكىمشىلىك ايىپپۇل سالدى»، – دەدى قازاقستان رەسپۋبليكاسى دەنساۋلىق ساقتاۋ مينيسترلىگى مەديسينالىق جانە فارماسەۆتيكالىق باقىلاۋ كوميتەتى دەپارتامەنتى باسشىسىنىڭ ورىنباسارى ەرلان تولەپبەرگەن.