اقتاۋداعى مەديسينالىق ورتالىق تىركەلمەگەن مەديسينالىق بۇيىمداردى قولدانعانى ءۇشىن 605 500 تەڭگە ايىپپۇل تولەپ، ليسەنزياسى ءبىر ايعا توقتاتىلدى، دەپ حابارلايدى infohub.kz.
اقتاۋ قالاسىنىڭ اكىمشىلىك قۇقىق بۇزۋشىلىقتار جونىندەگى سوتى تىركەلمەگەن مەديسينالىق بۇيىمداردى قولدانعان مەديسينالىق ورتالىققا قاتىستى ءىستى قارادى. ماڭعىستاۋ وبلىسى بويىنشا دەنساۋلىق ساقتاۋ مينيسترلىگىنىڭ مەديسينالىق جانە فارماسەۆتيكالىق باقىلاۋ كوميتەتىنىڭ دەپارتامەنتى پاسيەنتتىڭ شاعىمى بويىنشا تەكسەرۋ جۇرگىزدى.
ءوتىنىش بەرۋشى ءوز شاعىمىندا 2026 جىلى 18 مامىردا اتالعان مەديسينالىق ورتالىققا كەلىپ، مەديسينالىق قىزمەت العانىن، الايدا قىزمەتتەن كەيىن دەنساۋلىعى ناشارلاعانىن جەتكىزدى. تەكسەرۋ كەزىندە تىركەلمەگەن مەديسينالىق بۇيىمداردى قولدانۋ فاكتىسى راستالدى.
اكىمشىلىك جازا تاعايىنداۋ كەزىندە سوت ءىستىڭ ءمان-جايىن، كىنانى تولىق مويىنداعانىن جانە جاۋاپكەرشىلىكتى جەڭىلدەتەتىن ءمان-جايلاردى ەسكەرىپ، اكىمشىلىك ايىپپۇل مولشەرىن 30 پايىزعا ازايتتى. ناتيجەسىندە مەديسينالىق ورتالىققا 605 500 تەڭگە ايىپپۇل سالىندى. سونىمەن قاتار مەديسينالىق قىزمەتكە ارنالعان ليسەنزيا ءبىر ايعا توقتاتىلدى.
سونداي-اق سوت اكىمشىلىك قۇقىق بۇزۋشىلىقتىڭ نىسانى بولعان دارىلىك زاتتاردى تاركىلەپ، جويۋ تۋرالى شەشىم شىعاردى. سوت قاۋلىسى ءالى زاڭدى كۇشىنە ەنگەن جوق.