اقتاۋدا دەمالىس بازاسىنىڭ اۋماعىندا شامامەن 80 شارشى مەتر جەردى شارپىعان ءورت بولدى، دەپ حابارلايدى infohub.kz.
ماڭعىستاۋ وبلىسى توتەنشە جاعدايلار دەپارتامەنتىنىڭ مالىمەتىنشە، ءورت 19 شىلدەدە «زولوتوە سولنىشكو» دەمالىس بازاسىنىڭ اۋدانىندا ورنالاسقان «Shahristan» قوناق ءۇي كەشەنىنىڭ اۋماعىندا بولعان. ءتجد-نىڭ ناقتىلاۋىنشا، مەيرامحانانىڭ شاتىرى جانعان. قۇتقارۋشىلاردىڭ دەرەگىنشە، زارداپ شەككەندەر جوق.
«ءورت تۋرالى حابارلاما كەلىپ تۇسكەن سوڭ، وقيعا ورنىنا پوليسيا قىزمەتكەرلەرى دەرەۋ جەتتى. توتەنشە جاعداي قىزمەتتەرى كەلگەنگە دەيىن پوليسەيلەر ءقاۋىپتى اۋماقتى قورشاۋعا الىپ، ءورت ءسوندىرۋ كولىكتەرىنىڭ كەدەرگىسىز ءوتۋىن ۇيىمداستىردى، قوعامدىق ءتارتىپتى ساقتاپ، ازاماتتاردىڭ قاۋىپسىزدىگى ءۇشىن قاجەتتى شارالاردى قولداندى. پوليسيا قىزمەتكەرلەرىنىڭ ۇيلەسىمدى ءارى جەدەل ارەكەتىنىڭ ارقاسىندا ءقاۋىپتى ايماقتا ادامداردىڭ جينالۋىنا جول بەرىلمەي، قۇتقارۋ قىزمەتتەرىنىڭ كەدەرگىسىز جۇمىس ىستەۋىنە جاعداي جاسالدى»، — دەلىنگەن ۆەدومستۆو حابارلاماسىندا.