اقتاۋدا كەيبىر مەكتەپتەردە ساباق كەشكى سەگىزدەن كەيىن اياقتالاتىنىنا اتا-انالار نارازىلىق بىلدىرۋدە. بۇل جاعدايعا قالالىق ءبىلىم ءبولىمى تۇسىنىكتەمە بەردى، دەپ حابارلايدى infohub.kz سايتى.
جاريالانعان كەستەگە سايكەس، ەكىنشى اۋىسىمداعى سوڭعى جەتىنشى ساباق 20:05-تە اياقتالادى. اقتاۋ قالالىق ءبىلىم ءبولىمى تاربيە ءىسى جونىندەگى سەكتور مەڭگەرۋشىسى گاۋحار تىلەۋقۇلوۆا كەيبىر مەكتەپتەردە ەكىنشى اۋىسىمنىڭ سوڭعى ساباعى شىنىمەن وسى ۋاقىتتا اياقتالاتىنىن راستادى. ول ساباقتىڭ اياقتالۋ ۋاقىتى وقۋ جۇكتەمەسى مەن جاسالعان كەستەگە بايلانىستى ەكەنىن ءتۇسىندىردى.
اقتاۋدا بارلىعى 36 مەملەكەتتىك جالپى ءبىلىم بەرەتىن مەكتەپ بار. ونىڭ 35ء-ى ەكى اۋىسىمدا جۇمىس ىستەيدى، ال №31 مەكتەپتە وقۋ پروسەسى ءۇش اۋىسىمدا ۇيىمداستىرىلعان. گاۋحار تىلەۋقۇلوۆا ەكىنشى جانە ءۇشىنشى توقسانداردا ساباق ۇزاقتىعى 45 مينۋتتان 40 مينۋتقا قىسقاراتىنىن جەتكىزدى. بۇل ەكىنشى اۋىسىمدا وقيتىن وقۋشىلاردىڭ ۇيگە قايتۋ ۋاقىتىن قىسقارتۋعا مۇمكىندىك بەرەدى.
سونداي-اق، شەنەۋنىك باسقا مەكتەپتەردە ءۇشىنشى اۋىسىمدى ەنگىزۋ مۇمكىندىگىنە تۇسىنىكتەمە بەردى. ول قازىرگى ۋاقىتتا ءۇش اۋىسىمدى وقىتۋ تەك №31 مەكتەپتە (17 شاعىن اۋدان) وقۋشىلار سانىنىڭ كوپتىگىنە بايلانىستى ۇيىمداستىرىلعانىن اتاپ ءوتتى. قالانىڭ قالعان مەكتەپتەرىندە ءۇشىنشى اۋىسىمدى ەنگىزۋ جوسپارلانباعان.