اقتاۋ تۇرعىنى ەمدەۋ جوسپارىندا قاراستىرىلماعان ءۇش يمپلانت قويىلعان ستوماتولوگيالىق كلينيكادان سوت ارقىلى ءىشىنارا وتەماقى ءوندىرىپ الدى. جالپى وندىرىلگەن سوما 398 829 تەڭگەنى قۇرادى، دەپ حابارلايدى infohub.kz سايتى.
وقيعا جالپى ينگالياسيالىق ناركوزبەن ءتىس ەمدەۋدەن كەيىن باستالدى. ەر ادام كلينيكاعا كاريەس پەن ءپۋلپيتتى ەمدەۋ ءۇشىن بارعانىن، الايدا پروسەدۋرادان كەيىن وعان ءۇش يمپلانت قويىلعانىن انىقتاعانىن مالىمدەدى. كلينيكا بولسا، يمپلانت قويۋ ناۋقاسپەن الدىن الا كەلىسىلگەنىن العا تارتتى.
№2 سوتتىڭ شەشىمىنە سايكەس، 2025 جىلدىڭ قاراشاسىندا ەر ادام ستوماتولوگيامەن قىزمەت كورسەتۋگە شارت جاساسقان. ەمدەۋ جوسپارىندا بىرنەشە ءتىستىڭ تەرەڭ كاريەسىن جانە ءپۋلپيتتى جالپى ينگالياسيالىق ناركوزبەن ەمدەۋ كورسەتىلگەن. يمپلانت قويۋ شارتتا قاراستىرىلماعان.
تەراپەۆت دارىگەر جۇرگىزگەن وتانى ورتوپەد-يمپلانتولوگ دارىگەر جالعاستىردى. ناتيجەسىندە ناۋقاسقا ءۇش يمپلانت قويىلدى. يمپلانت قويىلعانىن تاراپتار سوتتا جوققا شىعارعان جوق.
«سوت وسى ءۇش يمپلانتتى قويۋ بويىنشا مەديسينالىق قىزمەت كورسەتۋگە جەكە شارت جاسالماعانىن انىقتادى. اقىلى مەديسينالىق قىزمەت كورسەتۋ ءۇشىن شارت جاساسۋ مىندەتتى شارت بولىپ تابىلادى. كلينيكا وكىلدەرى دارىگەرلەر مەن ناۋقاستىڭ اراسىندا يمپلانت قويۋ تۋرالى اۋىزشا كەلىسىم بولعانىن العا تارتتى. سونداي-اق جاۋاپكەر WhatsApp-تاعى حات الماسۋدى دا كورسەتتى. الايدا سوت بۇل دالەلدەردى قابىلدامادى. دارىگەرلەردىڭ كەلىسىم بولعانى تۋرالى كۋالىك كورسەتپەلەرىن سوت جەتكىلىكتى دەپ تانىمادى، ال WhatsApp-تاعى حات الماسۋدان، شەشىمگە سايكەس، تاراپتاردىڭ شارتتىڭ بارلىق ەلەۋلى تالاپتارى بويىنشا كەلىسىمگە كەلگەنىن انىقتاۋ مۇمكىن بولمادى»، — دەلىنگەن جاريالانىمدا.
كەيىن قويىلعان يمپلانتتار الىنىپ تاستالعانى بەلگىلى بولدى. وبلىستىق ستوماتولوگيالىق ورتالىقتىڭ مەديسينالىق كارتاسىنا سايكەس، 2025 جىلدىڭ 17 جەلتوقسانىندا ناۋقاستىڭ يمپلانتتارى الىنىپ، انتيبيوتيكتەر مەن باسقا دا دارىلەردى قامتيتىن ەم تاعايىندالدى. سول كۇنى ەر ادام دارى-دارمەككە 7 277 تەڭگە جۇمسادى.
«بۇل سومانى سوت ماتەريالدىق زالال دەپ تانىپ، كلينيكادان وندىرۋگە شەشىم قابىلدادى. ول سونداي-اق 5 ملن تەڭگە كولەمىندە مورالدىق زيان وتەماقىسىن تالاپ ەتتى. سوت بۇل تالاپتى ءىشىنارا قاناعاتتاندىرىپ، وتەماقىنى 350 مىڭ تەڭگە ەتىپ بەلگىلەدى. ناۋقاس سونداي-اق الىنعان يمپلانتتار مەن قاقپاقتاردىڭ ورنىنا بولاشاقتا يمپلانت قويۋعا 1،296 ملن تەڭگە ءوندىرۋدى سۇرادى. بۇل بولىكتە سوت تالاپتى قاناعاتتاندىرۋدان باس تارتتى، ويتكەنى اتالعان شىعىستار بولجامدى بولىپ، ءىس قارالعان كەزدە ءىس جۇزىندە جۇمسالماعان»، — دەپ قوستى باسىلىمدا.
قورىتىندىلاي كەلە، سوت ستوماتولوگيادان ونىڭ پايداسىنا: 7 277 تەڭگە ماتەريالدىق زالال، 350 000 تەڭگە مورالدىق زيان وتەماقىسى، 41 552 تەڭگە سوت شىعىستارىن وندىرۋگە شەشىم قابىلدادى. جالپى وندىرىلگەن سوما 398 829 تەڭگەنى قۇرادى. تالاپ ارىزدىڭ قالعان بولىگىندە سوت باس تارتتى.
بۇعان دەيىن استانا تۇرعىنى ءبىر ستوماتولوگيادا ۋادە ەتىلگەن، ءبىراق كورسەتىلمەگەن قىزمەتتەر ءۇشىن قاراجاتتى ءىشىنارا قايتارۋعا قول جەتكىزگەنىن حابارلاعان بولاتىنبىز.