اقتاۋدا ماس كۇيىندە كولىك باسقارعانى ءۇشىن ۇستالعان ايەل اكىمشىلىك قاماۋدان قۇتىلۋ ءۇشىن سوتقا جالعان جۇكتىلىك تۋرالى مەديسينالىق انىقتاما ۇسىنعان. بۇل تۋرالى infohub.kz سايتى حابارلايدى.
ماڭعىستاۋ وبلىستىق پروكۋراتۋراسىنىڭ مالىمەتىنشە، پوليسيا قىزمەتكەرلەرى ايەلدى ماس كۇيىندە كولىك جۇرگىزىپ بارا جاتقان جەرىنەن توقتاتقان. بۇل قۇقىق بۇزۋشىلىق ءۇشىن قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىندە 15 تاۋلىككە قاماۋعا الۋ جانە كولىك قۇرالىن باسقارۋ قۇقىعىنان 7 جىلعا ايىرۋ جازاسى قاراستىرىلعان.
ءىستى قاراۋ بارىسىندا بۇزۋشى سوتقا جۇكتىلىگىن راستايتىن مەديسينالىق قۇجات ۇسىنعان. وسى انىقتامانىڭ نەگىزىندە سوت ونى اكىمشىلىك قاماۋدان بوساتىپ، تەك قوسىمشا جازا – جۇرگىزۋشى كۋالىگىنەن 7 جىلعا ايىرۋ جازاسىن تاعايىنداعان.
الايدا اقتاۋ پروكۋراتۋراسى جۇرگىزگەن تەكسەرۋ ۇسىنىلعان انىقتامانىڭ جالعان ەكەنىن انىقتادى. پروكۋروردىڭ نارازىلىعى بويىنشا ماڭعىستاۋ وبلىستىق سوتى ءبىرىنشى ساتىداعى سوتتىڭ قاۋلىسىن وزگەرتىپ، 15 تاۋلىككە قاماۋعا الۋ جازاسىن تاعايىندادى.
مەديسينالىق قۇجاتتى جالعان جاساۋ جانە ونى پايدالانۋ فاكتىلەرى بويىنشا مەديسينا قىزمەتكەرى مەن ايەلگە قاتىستى قازاقستان رەسپۋبليكاسىنىڭ قىلمىستىق كودەكسىنىڭ 385-بابى بويىنشا قىلمىستىق ءىس قوزعالدى.