اقتاۋداعى ۇلكەن تۇرعىن ءۇي كەشەنىنىڭ تۇرعىندارى 40 گرادۋستىق اپتاپتا قۇرىلىس سالۋشىنىڭ قاتەلىگىنەن ەلەكتر قۋاتىنىڭ ءۇزىلۋى سالدارىنان سۋسىز قالىپ وتىر. حالىق جاعدايدى تۇزەتۋدى تالاپ ەتەدى، دەپ حابارلايدى infohub.kz سايتى.
تۇرعىنداردىڭ ايتۋىنشا، شىلدە ايىنداعى اپتاپتا، تەمپەراتۋرا +40 گرادۋسقا جۋىقتاعاندا، شامادان تىس جۇكتەمە سالدارىنان ەلەكتر قۋاتى وشەدى. ەلەكتر بولماعان سوڭ اۋىز سۋ مەن ليفت جۇمىسى توقتايدى. «جارىق وشسە، سۋىمىز بولمايدى. سەبەبى ءقازىر كوپقاباتتى ۇيلەردىڭ بارلىعىندا سۋ سورعىشتار ارقىلى بەرىلەدى. ال ەلەكتر بولماعاندىقتان سۋ بەرىلۋى توقتايدى. جوعارعى قاباتتار سۋسىز قالادى. ەڭ ءبىرىنشى ءوتىنىش: ەلەكتر ماسەلەسىن رەتتەڭىز»، — دەيدى تۇرعىن اسىل الدابەرگەن قىزى.
تۇرعىن ءۇي كەشەنىندە 800 پاتەر جانە شامامەن 1،5 مىڭ تۇرعىن بار، ونىڭ ىشىندە بالالار مەن قارتتار دا بار. كوپشىلىگى ۇيدەن شىقپاۋدى ءجون كورەدى، سەبەبى جوعارعى قاباتتارعا جاياۋ كوتەرىلۋگە تۋرا كەلەدى. قىزمەت كورسەتۋ كومپانياسىنىڭ باسشىسى مەرۋەرت كوشەرباەۆا مالىمدەدى: «جاز باستالىسىمەن ەلەكتر ۇزدىكسىز وشەدى. اۋىز سۋ سورعىشتارى جۇمىسىن توقتاتادى. سودان كەيىن ليفت توقتايدى. جاز باستالعاننان بەرى وسى وشىرۋلەر سالدارىنان ءبىزدىڭ ءتورت سورعىشىمىز كۇيىپ كەتتى. ءبىز ولاردى جوندەپ، قايتا ورناتامىز. ءبىراق وسىلاي جالعاسا بەرسە، بارلىق جابدىق ىستەن شىعادى».
تۇرعىندار ءتورت جىل بۇرىن ءۇيدى پايدالانۋعا بەرگەن قۇرىلىس سالۋشى ءالى كۇنگە دەيىن ەلەكترمەن جابدىقتاۋ كومپانياسىنا قاجەتتى قۇجاتتاردى تاپسىرماعاندىقتان، جەلىلەر يەسىز بولىپ سانالادى دەپ مالىمدەيدى. قۇزىرلى ورگاندارعا ۇجىمدىق ءوتىنىش ناتيجە بەرمەگەن. اكىمدىك ءوشىرۋدىڭ نەگىزگى سەبەبى — ەلەكتر جەلىسىنە شامادان تىس جۇكتەمە جانە رەزەرۆتىك كابەلدىڭ جوقتىعى ەكەنىن ءتۇسىندىردى. اقتاۋ قالاسى اكىمدىگىنىڭ تكش ءبولىمىنىڭ باس مامانى اسەت باسپاەۆ: «قۇرىلىس ۇيىمى ءوز ۋاقىتىندا ەكى كابەل تارتۋى كەرەك ەدى. الايدا قازىرگى تاڭدا مۇندا تەك بىرەۋى عانا بار. ياعني رەزەرۆتىك كابەل جوق. سوندىقتان ءوشىرۋ بولعان جاعدايدا قالپىنا كەلتىرۋ جۇمىستارى بەلگىلى ءبىر ۋاقىت الادى. كابەل جەلىلەرى ساتىپ الىندى. قالا بويىنشا كەزەكتىلىككە سايكەس ولاردى تارتۋ جۇمىستارى جۇرگىزىلۋدە»، — دەپ ءتۇسىندىردى. جۇمىستاردىڭ ناقتى اياقتالۋ مەرزىمى ايتىلمادى، ءبىراق ءبىر اپتا ىشىندە باستاۋعا ۋادە بەردى.