اقتاۋدا قالا جاعالاۋىندا قىزعا زورلاۋ ءقاۋپىن توندىرگەن ەر ادامعا قاتىستى ۇكىم شىقتى. وقيعا 2 تامىزدا بولعان، اگرەسسيۆتى قالا تۇرعىنى جولاۋشى قىزعا شابۋىل جاساعان، دەپ حابارلايدى infohub.kz سايتى.
اقتاۋ قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان سوتىنىڭ ءباسپاسوز قىزمەتىنەن ءمالىم ەتكەندەي، ءىس بۇگىن قارالدى. جەلىدە جاريالانعان ۆيدەولاردا ەر ادامنىڭ اق پيدجاك كيگەن قىزدى ۇستاپ تۇرىپ، ونىڭ بوسانىپ شىعۋعا تىرىسقانى كورىنەدى. ءوتىپ بارا جاتقاندار جانجالعا ارالاسقان، الايدا ەكىنشى ۆيدەودا كۇدىكتى «مەن سەنى زورلايمىن» دەپ قورقىتۋىن جالعاستىرادى.
سوت وتىرىسى بارىسىندا قۇقىق بۇزۋشى كىناسىن تولىق مويىندادى. سوتتا ونىڭ كىناسى پوليسيا قىزمەتكەرىنىڭ راپورتىمەن، اكىمشىلىك قۇقىق بۇزۋشىلىق تۋرالى حاتتامامەن، №9649 مەديسينالىق كۋالاندىرۋ قورىتىندىسىمەن جانە وقيعا ورنىنداعى بەينەجازبامەن راستالعانى اتاپ ءوتىلدى.
ەر ادامنىڭ ارەكەتتەرى ق ر اقبتك-نىڭ 434-بابىنىڭ 2-بولىگىنە (ۇساق بۇزاقىلىق) سايكەس سارالانعان، ول 60-تان 100 ساعاتقا دەيىنگى مەرزىمگە قوعامدىق جۇمىستارعا تارتۋ نەمەسە 15-تەن 30 تاۋلىككە دەيىنگى مەرزىمگە اكىمشىلىك قاماۋعا الۋ جازاسىن كوزدەيدى. سوت قۇقىق بۇزۋشىعا ەڭ جوعارى جازانى – 30 تاۋلىك قاماۋدى تاعايىندادى. قاۋلى ءالى زاڭدى كۇشىنە ەنگەن جوق.