2026 جىلدىڭ باسىنان بەرى اقتوبە وبلىسى پوليسياسىنا ادامداردىڭ حابارسىز كەتۋى تۋرالى 900-دەن استام حابارلاما كەلىپ تۇسكەن. ونىڭ ىشىندە 470ء-ى كامەلەتكە تولماعاندارعا قاتىستى بولعان، دەپ حابارلايدى infohub.kz سايتى.
بەلسەندى ىزدەۋ شارالارىنىڭ ناتيجەسىندە حابارسىز كەتكەندەردىڭ بارلىعى دەرلىك تابىلىپ، ۇيلەرىنە ورالعان. قازىرگى تاڭدا ءۇش ادامنىڭ قايدا ەكەنى بەلگىسىز – ولاردى ىزدەۋ جالعاسۋدا. پوليسيا مالىمەتى بويىنشا، ەرەسەكتەر كوبىنەسە تۋىستارىنا ەسكەرتپەي جۇمىسقا كەتىپ قالادى نەمەسە تۇرعىلىقتى جەرلەرىن اۋىستىرىپ، بايلانىسقا شىقپايدى. ال كامەلەتكە تولماعاندار وتباسىنداعى جانجالدار مەن اتا-انالارىمەن تۇسىنىسپەۋشىلىك سالدارىنان نەمەسە سالدارىن ويلاماستان ۇيدەن كەتەدى.
قازىرگى ۋاقىتتا پوليسيا 44 جاستاعى ەكى ەر ادام مەن ءبىر زەينەتكەردى: اسىلحان حاسەنوۆتى، سەرگەي كوۆتۋندى جانە بولات قوڭىرباەۆتى ىزدەستىرۋدە. ءاربىر جوعالعان ادام بويىنشا ىزدەۋ توپتارى قۇرىلعان. پوليسەيلەر تۋىستارى مەن كۋاگەرلەردەن جاۋاپ الىپ، بەينەباقىلاۋ كامەرالارىنىڭ جازبالارىن تەكسەرەدى، جوعالعانداردىڭ بولۋى مۇمكىن جەرلەردى قاراپ، سىرتقى كۇزەت قىزمەتىن جۇمىلدىرىپ، ەرىكتىلەرمەن بىرلەسىپ جۇمىس ىستەيدى. قاجەت بولعان جاعدايدا ىزدەۋ جۇمىستارى وبلىس اۋماعىنان تىس جەرلەردە دە جۇرگىزىلەدى. ىزدەلىپ جاتقان ادامدار تۋرالى اقپاراتى بار ازاماتتار 102 نومىرىنە حابارلاسۋعا نەمەسە جاقىن ماڭداعى پوليسيا بولىمىنە جۇگىنۋگە شاقىرىلادى.