سوت اقتاعان اقتوبەلىك ايەل ءجشس-نىڭ اقشاسىن جىمقىرۋ ءىسى بويىنشا مەملەكەتتەن مورالدىق زيان ءۇشىن 15 ميلليون تەڭگە وتەماقى تالاپ ەتكەن ەدى، ءبىراق الدەقايدا از — 1،5 ميلليون تەڭگە الادى. سونىمەن قاتار، وعان ادۆوكات قىزمەتىنە جۇمسالعان 5،5 ميلليون تەڭگە وتەلەدى، دەپ حابارلايدى infohub.kz سايتى.
2023 جىلى كاسىپورىننىڭ ەكى مەنەدجەرى مەن ولاردىڭ كومەكشىلەرى ۇزاق مەرزىمگە باس بوستاندىعىنان ايىرىلدى. وسى ءىس بويىنشا وتكەن ايەل قىلمىس قۇرامىنىڭ بولماۋىنا بايلانىستى تولىق اقتالدى.
اقتالعان سوڭ ول قارجى مينيسترلىگىنە زاڭسىز قىلمىستىق قۋدالاۋدان كەلتىرىلگەن مورالدىق ازاپ ءۇشىن 15 ميلليون تەڭگە وتەماقى تالاپ ەتىپ، سوتقا شاعىمداندى. تالاپكەردىڭ ايتۋىنشا، قىلمىستىق ءىس سالدارىنان ءۇش جىلعا جۋىق ۋاقىت بويى اۋىر دەپرەسسيالىق كۇيدە بولىپ، قالىپتى ءومىر سۇرە الماعان.
سوت تالاپتى ءىشىنارا قاناعاتتاندىردى. شەشىم بويىنشا، قارجى مينيسترلىگى وعان مورالدىق زيان ءۇشىن 1،5 ميلليون تەڭگە تولەيدى، بۇل سۇرالعان سومادان ون ەسە از. سونداي-اق مەملەكەت ادۆوكات قىزمەتىنە جۇمسالعان 5،5 ميلليون تەڭگەنى وتەيدى.