اقتوبەدە ۇلتتىق ۇلاننىڭ №6655 اسكەري بولىمىندە مەرزىمدى قىزمەت اتقارىپ جۇرگەن 18 جاستاعى ساربازدىڭ ارىزى بويىنشا سوتقا دەيىنگى تەرگەۋ باستالدى. جىگىتتى ءۇش سەرجانت بىرنەشە رەت ۇرىپ-سوققانىن ايتادى، دەپ حابارلايدى infohub.kz سايتى.
اسكەري قىزمەتشى ەركەبۇلان دوسىمبەت — اقتاۋدان. اناسى گۇلدانا كەتيباەۆانىڭ ايتۋىنشا، ول 2026 جىلدىڭ 3 شىلدەسىنەن بەرى اقتوبەدە مەرزىمدى قىزمەت وتەپ جاتىر.
ايەلدىڭ ايتۋىنشا، 4 قىركۇيەكتە وعان اۋرۋحانادان قوڭىراۋ شالىپ، ۇلىنىڭ اۋرۋحاناعا جات قىزىلعانىن حابارلاعان. ول كەزدە جىگىت مەديسينالىق مەكەمەدە ءۇشىنشى كۇنى جاتقان.
الدىمەن اسكەري قىزمەتشىنى ۋرولوگ قارادى، الايدا تالداۋلار ينفەكسيانى انىقتاعان جوق. سودان كەيىن تراۆماتولوگ تەكسەردى، ول قۋىق پروبلەمالارى جاراقاتقا بايلانىستى بولۋى مۇمكىن دەگەن بولجام ايتتى.
دارىگەرمەن سويلەسكەننەن كەيىن سارباز اناسىنا بولىمدە ونى مەزگىل-مەزگىل ۇرىپ-سوققانىن ايتتى. تراۆماتولوگ پوليسيانى شاقىردى، سودان كەيىن اسكەري قىزمەتشى ارىز جازدى.
كەيىن بەينەبايلانىس كەزىندە ەركەبۇلان دوسىمبەت اناسىنا ونى اعا سەرجانت پەن تاعى ەكى سەرجانت ۇرعانىن حابارلادى. جىگىتتىڭ تۋىستارى تەكسەرۋ جۇرگىزىپ، وقيعانىڭ ءمان-جايىن انىقتاۋدى تالاپ ەتتى.
ۇلتتىق ۇلاننىڭ «باتىس» وڭىرلىك قولباسشىلىعىنىڭ ءباسپاسوز قىزمەتى تەرگەۋدى قازاقستان ءىىم باتىس وڭىرلىك اسكەري-تەرگەۋ باسقارماسىنىڭ اقتوبە ءبولىمى جۇرگىزىپ جاتقانىن راستادى.
«قازىرگى ۋاقىتتا ءىستىڭ بارلىق ءمان-جايى انىقتالۋدا. جان-جاقتى جانە وبەكتيۆتى تەكسەرۋ ناتيجەلەرى بويىنشا ءتيىستى قۇقىقتىق باعا بەرىلەتىن بولادى»، — دەپ حابارلادى قولباسشىلىقتا.
تەرگەۋدىڭ باسقا مالىمەتتەرى ازىرگە جاريالانبايدى. جاريالانىم كەزىندە اسكەري قىزمەتشىلەردىڭ كىناسى تۋرالى رەسمي قورىتىندى جوق.