اقتوبە وبلىسىندا «قاراسورا-2026» جەدەل-پروفيلاكتيكالىق ءىس-شاراسى باستالعالى 87 ەسىرتكى قۇقىقبۇزۋشىلىعى تىركەلىپ، 346 كيلوگرامم ەسىرتكى تاركىلەندى، دەپ حابارلايدى infohub.kz سايتى.
31 قازانعا دەيىن جالعاساتىن ءىس-شارا ەسىرتكىنىڭ زاڭسىز اينالىمىن انىقتاۋ، قۇرامىندا ەسىرتكى بار وسىمدىكتەردى جويۋ جانە ەسىرتكى زەرتحانالارىن جويۋ ماقساتىندا بۇكىل قازاقستان بويىنشا وتكىزىلۋدە.
وڭىردە پوليسيا ەسىرتكى وسىمدىكتەرىنىڭ ءوسۋى مۇمكىن جەرلەردى تەكسەرىپ، ولاردى زاڭسىز وسىرۋگە قاتىسى بار ادامداردى انىقتاۋدا. قيىن جەرلەرگە ەرەكشە نازار اۋدارىلىپ، ولاردى تەكسەرۋ ءۇشىن تىكۇشاق پايدالانىلادى. اۋە مونيتورينگى جەردە تەكسەرۋ قيىن ۋچاسكەلەردە جۇرگىزىلۋدە.
رەسپۋبليكالىق ماڭىزى بار اۆتوجولداردا بەكەتتەر مەن ءموبيلدى توپتار جۇمىس ىستەيدى. قىزمەتتىك يتتەردىڭ كومەگىمەن پوليسەيلەر كولىكتەردى ەسىرتكىنىڭ زاڭسىز تاسىمالدانۋىنا تەكسەرەدى.
وپەراسيا باستالعالى وڭىردە جابايى وسەتىن 5 855 ءتۇپ قاراسورا جويىلدى.
ەسىرتكىنىڭ زاڭسىز اينالىمىنا قاتىستى ينتەرنەت-رەسۋرستارعا ەرەكشە نازار اۋدارىلۋدا. قازاقستان بويىنشا دومەندىك ايماقتا 923 سايت انىقتالىپ، ولار تۋرالى اقپارات «كيبەرنادزور» جۇيەسىنە ەنگىزىلدى.
سونىمەن قاتار، جىل باسىنان بەرى «انتيفرود» جۇيەسى ارقىلى قۇقىققا قارسى ارەكەتتەردە پايدالانىلۋى مۇمكىن 650 بانك كارتاسى انىقتالدى. اقپارات بۇعاتتاۋعا جىبەرىلدى، بۇعاتتالعان قاراجاتتىڭ جالپى سوماسى 5 ميلليون 598،3 مىڭ تەڭگەنى قۇرادى.
پوليسيا ازاماتتاردى ەسىرتكىنى زاڭسىز ساقتاۋ، دايىنداۋ، تاسىمالداۋ جانە تاراتۋ فاكتىلەرى تۋرالى حابارلاۋعا شاقىرادى.
بۇعان دەيىن اقتوبەدە ەسىرتكى ساتاتىن ينتەرنەت-دۇكەن ۇيىمداستىردى دەگەن كۇدىككە ىلىنگەن 38 جاستاعى ەر ادام ۇستالعانى حابارلانعان بولاتىن. ارنايى وپەراسيا كەزىندە ودان قارۋ، وق-دارىلەر جانە ف-1 گراناتاسى تاركىلەندى. كەيىن پوليسيا جالدامالى پاتەردەن 70 قۇتى WAX گاشيش مايى مەن زاڭسىز ارەكەتتەن تۇسكەن اقشا تابىلعان كۇدىكتى «زاكلادچيك» ۇستادى. ەسىرتكىنى ەرەكشە ءىرى مولشەردە، سونداي-اق قارۋ مەن وق-دارىلەردى زاڭسىز ساقتاۋ فاكتىلەرى بويىنشا سوتقا دەيىنگى تەرگەۋ جۇرگىزىلۋدە.