اقتوبەدە 1981 جىلدان بەرى جۇمىس ىستەپ كەلە جاتقان ستانسيانى الماستىراتىن جاڭا كارىز تازارتۋ قۇرىلىستارىنىڭ (كتق) قۇرىلىسى باستالدى. بۇل سوڭعى 45 جىلداعى وسىنداي اۋقىمدى جوبا، دەپ حابارلايدى infohub.kz سايتى.
وبلىس اكىمدىگىنىڭ مالىمەتىنشە، جوبانىڭ قۇنى شامامەن 43 ميلليارد تەڭگەنى قۇرايدى. جاڭا ينفراقۇرىلىم تەك توزعان جابدىقتى الماستىرىپ قانا قويماي، قالانىڭ ودان ءارى دامۋى ءۇشىن قۋات قورىن دا جاساۋى ءتيىس.
قولدانىستاعى كتق 45 جىل بۇرىن پايدالانۋعا بەرىلگەن، بۇگىندە ونىڭ توزۋى شامامەن 70 پايىزدى قۇرايدى. ستانسياعا كۇن سايىن 70-80 مىڭ تەكشە مەتر اعىندى سۋ تۇسەدى، ال تاسقىن كەزەڭىندە بۇل كولەم 95 مىڭ تەكشە مەترگە جەتەدى. سونىمەن قاتار، اقتوبە حالقىنىڭ تەك 62 پايىزى عانا ورتالىقتاندىرىلعان كارىز جۇيەسىمەن قامتىلعان.
جاڭا ستانسيانىڭ قۋاتى جوعارى بولادى: ول تاۋلىگىنە 100 مىڭ تەكشە مەتر اعىندى سۋدى تازارتۋعا ەسەپتەلگەن، ال ەڭ جوعارى كەزەڭدە ونىمدىلىك 130 مىڭ تەكشە مەترگە جەتۋى مۇمكىن.
«جوبانى قارجىلاندىرۋ مەملەكەتتىك كەپىلدىكپەن ەۋروپا قايتا قۇرۋ جانە دامۋ بانكىنىڭ قارىز قاراجاتى ەسەبىنەن جۇزەگە اسىرىلادى. نەسيەنى وتەۋ جانە وعان قىزمەت كورسەتۋ شىعىندارىنىڭ 90 پايىزىنا دەيىنى رەسپۋبليكالىق بيۋدجەتتەن، تاعى كەمىندە 10 پايىزى جەرگىلىكتى بيۋدجەتتەن قامتاماسىز ەتىلەدى. وسىلايشا، بارلىق قارجىلىق جۇك تۇرعىندارعا تۇسپەيدى»، – دەدى اقتوبە وبلىسىنىڭ اكىمى اسحات شاحاروۆ.
«Aqtobe su-energy group» اق باس ديرەكتورى ناعىمجان الدياروۆتىڭ ايتۋىنشا، جاڭا ستانسيادا ءتورت دەڭگەيلى تازارتۋ جۇيەسى قاراستىرىلعان. ول مەحانيكالىق جانە بيولوگيالىق تازارتۋدى، ۋلتراكۇلگىن ساۋلەمەن زالالسىزداندىرۋدى جانە بيوگاز الۋمەن تۇنبانى قايتا وڭدەۋدى قامتيدى. تۇنبانى كەپتىرىپ، تۇيىرشىكتەرگە اينالدىرۋ جوسپارلانسا، بيوگازدى ەلەكتر ەنەرگياسىن وندىرۋگە پايدالانۋ كوزدەلۋدە.
جوبا اياسىندا تازارتىلعان سۋ اعىزىلاتىن ەكى قۇبىردى ساناسيالاۋ جانە گەرمەتيزاسيالاۋ دا قاراستىرىلعان.
قۇرىلىس ءقازىردىڭ وزىندە باستالدى. جۇمىس كولەمى ۇلعايعان سايىن الاڭداعى ماماندار سانىن 350 ادامعا دەيىن ارتتىرۋ جوسپارلانۋدا. جوبانى 2028 جىلدىڭ مامىر ايىندا اياقتاۋ كوزدەلۋدە.
جاڭا ستانسيا ىسكە قوسىلعاننان كەيىن تازارتىلعان سۋدى بالىق شارۋاشىلىعى ماقساتتارىندا پايدالانۋعا نەمەسە ەكولوگيالىق تالاپتار ساقتالعان جانە قاجەتتى جوبالىق قۇجاتتاما بولعان جاعدايدا سۋ وبەكتىسىنە اعىزۋعا بولادى. قولدانىستاعى كتق جاڭا ستانسيا ىسكە قوسىلعانعا دەيىن جۇمىسىن جالعاستىرادى، ودان كەيىن ولاردىڭ ودان ءارى جاي-كۇيى مەن قايتا قۇرۋ قاجەتتىلىگى انىقتالادى.