اقتوبەدە جۇمىس بەرۋشى قىزمەتكەرگە وندىرىستە اۋىر جاراقات العانى ءۇشىن 10 ملن تەڭگەدەن استام تولەيدى، دەپ حابارلايدى infohub.kz سايتى.
اقتوبە وبلىسى سوتتارىنىڭ رەسمي Telegram-ارناسىندا حابارلانعانداي، اقتوبە قالالىق سوتى قىزمەتكەردىڭ جشس-كە ەڭبەك مىندەتتەرىن اتقارۋ كەزىندە بولعان جازاتايىم وقيعا سالدارىنان كەلتىرىلگەن ماتەريالدىق زالالدى وتەۋ جانە مورالدىق زياندى وتەۋ تۋرالى تالاپ ارىزى بويىنشا ازاماتتىق ءىستى قارادى.
سوت وتىرىسىندا جازاتايىم وقيعا ءقاۋىپسىز ەڭبەك جاعدايلارىن قامتاماسىز ەتپەگەن جانە ەڭبەكتى قورعاۋ سالاسىنداعى زاڭناما تالاپتارىن ساقتاماعان جۇمىس بەرۋشىنىڭ كىناسىنەن بولعانى انىقتالدى. وقيعا سالدارىنان قىزمەتكەر اۋىر دەنە جاراقاتىن الدى.
ءىس قۇجاتتارى مەن مەديسينالىق ساراپتاما قورىتىندىلارىنا سايكەس، تالاپكەرگە II توپتاعى مۇگەدەكتىك بەلگىلەنىپ، كاسىبي ەڭبەككە قابىلەتتىلىگىن جوعالتۋ دارەجەسى 80 پايىزدى قۇرادى.
ۇسىنىلعان دالەلدەمەلەردى باعالاي كەلە، سوت تالاپكەردىڭ تالاپتارىن ءىشىنارا نەگىزدى دەپ تانىدى. مورالدىق زياننىڭ مولشەرىن انىقتاۋ كەزىندە سوت العان جاراقاتتاردىڭ سيپاتى مەن اۋىرلىعىن، ەمدەلۋ ۇزاقتىعىن، مۇگەدەكتىكتىڭ بەلگىلەنۋىن، فيزيكالىق جانە رۋحاني ازاپتىڭ دارەجەسىن، سونداي-اق ەڭبەك قىزمەتىن جۇزەگە اسىرۋ مۇمكىندىگىنىڭ ايتارلىقتاي شەكتەلۋىن جانە بۇرىنعى ءومىر سالتىنىڭ بۇزىلۋىن ەسكەردى.
سوت شەشىمىمەن جۇمىس بەرۋشىدەن تالاپكەردىڭ پايداسىنا 10 ملن تەڭگە كولەمىندە مورالدىق زياننىڭ وتەماقىسى جانە قاجەتتى دارى-دارمەكتەردى ساتىپ الۋعا جانە ەمدەلۋگە بايلانىستى كولىك شىعىندارىن قامتيتىن 255 مىڭ تەڭگە كولەمىندەگى ماتەريالدىق زالال ءوندىرىلدى.
سوت شەشىمى زاڭدى كۇشىنە ەنگەن جوق.