اقتوبەدەگى «جيگەر» قۇرىلىس بازارىندا ءورت شىعىپ، قالا ءۇستىن قارا ءتۇتىن باستى. بۇل تۋرالى infohub.kz حابارلايدى.
101 قىزمەتىنە اقتوبە قالاسى استانا اۋدانىنداعى «جيگەر» قۇرىلىس بازارى اۋماعىنداعى قويما ءۇي-جايلارىنىڭ تۇتانعانى تۋرالى حابار ءتۇستى. العاشقى بولىمشەلەر كەلگەندە قويمانىڭ ىشىندەگى قۇرىلىس ماتەريالدارىمەن اشىق جانۋى انىقتالدى. وقيعا ورنىنا تجم كۇشتەرى مەن قۇرالدارى دەرەۋ جەتتى. ءورتتى سوندىرۋگە تجد جەدەل-قۇتقارۋ جاساعىنىڭ قۇتقارۋشىلارى، اپاتتار مەديسيناسى ورتالىعىنىڭ ماماندارى، تجم 20982 اسكەري ءبولىمىنىڭ اسكەري قىزمەتشىلەرى، سونداي-اق جەرگىلىكتى اتقارۋشى ورگاندار، پوليسيا دەپارتامەنتى، جەدەل جاردەم بريگادالارى جۇمىلدىرىلدى.
ورنىندا جەدەل شتاب قۇرىلدى. عيماراتتىڭ كونسترۋكسيالىق ەرەكشەلىكتەرى ءورت ءسوندىرۋدى قيىنداتتى: قويما مەتالل كونسترۋكسيالاردان جاسالىپ، ءپروفيلدى پاراقپەن قاپتالعان، شاتىرى اعاش جۇيەمەن ورناتىلعان.
ءورت ءسوندىرۋ كەزىندە ءورت ءسوندىرۋشى ديماش جەتپىسباي جانعان عيماراتتان كىشكەنتاي كۇشىكتى الىپ شىقتى. «ءبىز ءۇشىن ءاربىر ءومىر ماڭىزدى»، — دەلىنگەن تجم حابارلاماسىندا. ساعات 19:01-دە ءورت ءسوندىرىلدى. زارداپ شەككەندەر جوق. ءورتتىڭ سەبەبى انىقتالۋدا.