اقتوبەدە ەكى جىل بۇرىن قۇرىلىستا بيىكتىكتەن قۇلاپ، مۇگەدەك بولىپ قالعان دانەكەرلەۋشىنىڭ وتباسى جۇمىس بەرۋشىدەن وتەماقى تالاپ ەتىپ جاتىر، دەپ حابارلايدى infohub.kz سايتى.

2024 جىلدىڭ قاراشا ايىندا 20 جىلدىق تاجىريبەسى بار دانەكەرلەۋشى الەكساندر تۋريانسكي مەتالل كونسترۋكسيالاردى ورناتۋ كەزىندە ءۇشىنشى قاباتتان قۇلاپ كەتتى. وقىس وقيعا سالدارىنان ول باس سۇيەگى، كەۋدە قۋىسى جانە وكپەسىنەن اۋىر جاراقات الىپ، جامباس سۇيەگى سىنىپ، ءىشىنارا ەستە ساقتاۋ قابىلەتىنەن ايىرىلدى.

«مەن ەشتەڭە ەسىمدە جوق. مەن اناما: "ليۋلكا تەڭسەلىپ تۇر" دەپ ايتتىم. مىنە، تەڭسەلە بەرىپ، قۇلادىم. وتەماقى تولەسىن، ءارى قاراي ءومىر ءسۇرۋ كەرەك. اقشانىڭ ءبارى كەرەك. ولار ەشتەڭە ىستەگىسى كەلمەيدى»، — دەدى زارداپ شەككەن الەكساندر تۋريانسكي.

ەر ادامنىڭ اناسىنىڭ ايتۋىنشا، ۇلى جۇمىسقا ورنالاسقاننان كەيىن ءۇشىنشى كۇنى بيىكتىكتەن قۇلاعان. ول 15 كۇن كومادا جاتتى، جالپى اۋرۋحانادا ءۇش اي بولدى. ءقازىر ول ءبىرىنشى توپتاعى مۇگەدەك. ونىڭ ايتۋىنشا، دارى-دارمەككە، ماسساجعا جانە دارىگەرلەرگە اقشا جەتپەيدى. ال جۇمىس بەرۋشى، ايەلدىڭ سوزىنشە، العاشىندا ازداپ كومەكتەسكەن، ءبىراق كەيىن توقتاتقان.

«ولار بىرتە-بىرتە بىزدەن الشاقتادى. بولدى، ەشقانداي كومەك جوق. مەن زەينەتاقى الاتىنمىن — ءبارى دارىگە كەتەتىن. ولار بىزگە ەشتەڭە وتەمەدى»، — دەدى زارداپ شەككەننىڭ اناسى ليۋبوۆ تۋريانسكايا.

ەڭبەك ينسپەكسياسى تەرگەۋ جۇرگىزدى. الدىمەن جۇمىس بەرۋشىنىڭ كىناسى ءىشىنارا دالەلدەندى.

«80% — جۇمىس بەرۋشىنىڭ كىناسى، 20% — جۇمىسشىنىڭ كىناسى. قاۋىپسىزدىك ەرەجەلەرى مەن ەڭبەكتى قورعاۋ تالاپتارىن ساقتاماۋمەن قاتار، جۇمىسشىمەن نۇسقاۋلىق جۇرگىزىلمەگەن. مۇنىڭ ءبارى ارنايى تەرگەۋ اكتىسىندە تىركەلدى»، — دەدى اقتوبە وبلىسى بويىنشا ەڭبەك قاۋىپسىزدىگىن باقىلاۋ ءبولىمىنىڭ باسشىسى قۋانىش كامييەۆ.

كەيىن سوت جۇمىس بەرۋشىنىڭ كىناسىن 100 پايىز دەپ انىقتادى. كومپانيا وكىلدەرى وندىرىستەگى وقىس وقيعادان كەيىن زاڭعا سايكەس ارەكەت ەتكەندەرىن ايتادى.

«ولار پامپەرس پەن باسقا زاتتارعا اقشا سۇراعاندا — ءبارى تولەندى. ءبىراق ماسەلە مىنادا، تۋريانسكي زاڭدى تولىق ساقتامادى. وقىس وقيعا بولعاننان كەيىن ءبىز قۇجاتتاردى بەردىك، ولار ساقتاندىرۋ كومپانياسىنا جۇگىنۋى كەرەك ەدى»، — دەدى "كابلەنوۆا" جك رەسمي وكىلى تولەگەن ەسەنعۋجين.

ەندى بۇل ىسكە سوت نۇكتە قويۋى ءتيىس. زارداپ شەككەن تاراپ مورالدىق جانە ماتەريالدىق زالالدى وتەۋ رەتىندە 32 ملن تەڭگە تالاپ ەتىپ وتىر.