اقتوبە وبلىسى پولتاۆكا اۋىلىندا 99 ۇيگە تابيعي گاز قوسىلدى. وندا 316 ادام تۇرادى. بۇل تۋرالى infohub.kz حابارلايدى.
اقتوبە وبلىسى اكىمىنىڭ ورىنباسارى اسىلبەك ەسەنبايەۆ سالتاناتتى ءىس-شارادا ەلدى مەكەندەردى گازداندىرۋ مەملەكەت ساياساتىنىڭ باسىم باعىتى ەكەنىن ايتتى. ونىڭ ايتۋىنشا، بۇل اۋىل تۇرعىندارىنىڭ ءومىر ساپاسىن ارتتىرۋعا باعىتتالعان.
جوبانى ىسكە اسىرۋعا 581،4 ملن تەڭگە جۇمسالدى. جۇمىستاردى GazMart كومپانياسى جۇرگىزدى. جوبا اياسىندا 6،4 كم كىرەتىن گاز قۇبىرى جانە بارلىق قاجەتتى ينجەنەرلىك ينفراقۇرىلىم سالىندى.
اكىمدىك دەرەگىنشە، قازىرگى تاڭدا وڭىردەگى حالىقتى گازداندىرۋ دەڭگەيى 97،5%-عا جەتتى. 2025 جىلى 31 ەلدى مەكەنگە تابيعي گاز بەرىلدى، وندا 13 مىڭنان اسا ادام تۇرادى.
2026 جىلى بيلىك تاعى 8 اۋىلدى گازداندىرۋدى جوسپارلاپ وتىر. ولاردا 3،7 مىڭعا جۋىق ادام تۇرادى. بۇگىندە 5 ەلدى مەكەنگە تابيعي گاز بەرىلدى، وندا 2 126 ادام تۇرادى.
بۇعان دەيىن قازاقستاندا گاز ءوندىرۋدى ىنتالاندىرۋ ءۇشىن باعالار قايتا قارالاتىنى حابارلانعان بولاتىن.