قورعانىس مينيسترلىگىنىڭ اسكەري قىزمەتشىلەرى اقتوبە وبلىسىنداعى سۋ باسقان 403 گەكتار اۋماقتى دەزينفەكسيالادى، دەپ حابارلايدى infohub.kz سايتى.
ورتالىق كوممۋنيكاسيالار قىزمەتىندەگى بريفينگتە توتەنشە جاعدايلار مينيسترلىگىنىڭ (تجم) وكىلى اسقار ءشارىپ سۋ تاسقىنى جاعدايى بويىنشا جاڭا دەرەكتەردى جاريالادى. «اتىراۋ، يندەر، ماحامبەت، يساتاي جانە قۇرمانعازى اۋداندارىندا 500 كم-دەن استام بوگەت سالىندى. قۇلسارىدا سۋ باسقان اۋماقتاردان جىلجىمالى سورعى ستانسيالارى مەن موتوپومپالاردىڭ كومەگىمەن 207 مىڭ تەكشە مەتردەن استام سۋ سورىلدى. رەسپۋبليكا بويىنشا 38 521 ادام ۇيىنە قايتتى. ەۆاكۋاسيالىق پۋنكتتەردە 6 726 ادام قالىپ وتىر»، — دەپ سپيكەردىڭ ءسوزىن Kazinform ءتىلشىسى كەلتىردى.
ول سۋ تاسقىنى باستالعاننان بەرى 12،9 ملن تەكشە مەتردەن استام ەرىگەن سۋ سورىلعانىن، 7 ملن مەشكوتار جانە 1،5 ملن توننا ينەرتتى ماتەريال توسەلگەنىن قوستى.
اۆاريالىق-قۇتقارۋ جانە سۋ تاسقىنىنا قارسى جۇمىستارعا بارلىعى 20 مىڭنان استام ادام جانە 2 772 بىرلىك تەحنيكا، 335 سۋ سورعىش قۇرال، 249 ءجۇزۋ قۇرالى، سونداي-اق 7 اۋە كەمەسى جۇمىلدىرىلدى.
اتىراۋ وبلىسىندا ۇشقىشسىز ۇشۋ اپپاراتتارى ارقىلى جايىق وزەنىندەگى سۋ دەڭگەيىنىڭ مونيتورينگى جالعاسۋدا. جاعالاۋدى نىعايتۋ جۇمىستارى جۇرگىزىلۋدە.
قويىلعان مىندەتتەردىڭ ورىندالۋىنا بايلانىستى قورعانىس مينيسترلىگىنىڭ الماتى جانە قاراعاندى وبلىسىنداعى كۇشتەرى مەن قۇرالدارىنىڭ ءبىر بولىگى بۇرىن باتىس قازاقستان جانە سولتۇستىك قازاقستان وبلىستارىنا جىبەرىلگەن بولاتىن، ەندى تۇراقتى ورنالاسۋ ورىندارىنا قايتارىلۋدا.