اقتوبە وبلىسىندا 2024 جىلعى سۋ تاسقىنىنان قيراعان ۋيل وزەنى ارقىلى وتەتىن جاڭا كوپىر پايدالانۋعا بەرىلدى، دەپ حابارلايدى infohub.kz.
وبلىس اكىمدىگىنىڭ مالىمەتىنشە، ۋيل اۋدانىندا ۋيل اۋىلىنا اپاراتىن تاس جولداعى كوپىردى قايتا جاڭارتۋ جۇمىستارى تولىق اياقتالدى. جاڭا كوپىردىڭ سالتاناتتى اشىلۋى 22 تامىزدا ءوتتى. شاراعا اقتوبە وبلىسى اكىمىنىڭ ورىنباسارى اسىلبەك ەسەنبايەۆ، اۋدان باسشىلىعى، مەردىگەر ۇيىم وكىلدەرى، اۋداننىڭ قۇرمەتتى ازاماتتارى مەن اۋىل تۇرعىندارى قاتىستى.
«ءبىز ءۋيلدى وبلىس ورتالىعىمەن بايلانىستىراتىن كوپتەن كۇتكەن جاڭا كوپىردى پايدالانۋعا بەرۋ الدىندا تۇرمىز. نىساننىڭ كۇردەلىلىگى مەن ماڭىزدىلىعىن ەسكەرە وتىرىپ، جوبالاۋ كەزەڭىنەن بۇگىنگى كۇنگە دەيىن قۇرىلىس قاتاڭ تەحنيكالىق باقىلاۋدا بولدى»، — دەدى اسىلبەك ەسەنبايەۆ.
ءوڭىر باسشىسىنىڭ ورىنباسارى كوپىر قۇرىلىسى ەكى كەزەڭدە جۇرگىزىلگەنىن، ونىڭ ىشىندە اۋقىمدى جانە ۇزاققا سوزىلعان جەراستى جۇمىستارى ورىندالعانىن اتاپ ءوتتى. ونىڭ ايتۋىنشا، جاڭا كوپىر وڭىردەگى ءىرى كوپىر قۇرىلىستارىنىڭ بىرىنە اينالدى جانە جولاۋشىلار قوزعالىسىنىڭ قاۋىپسىزدىگىن قامتاماسىز ەتەدى.
اكىمدىكتە 2024 جىلعى سۋ تاسقىنى كەزىندە ۋيل اۋىلىنا اپاراتىن تاس جولداعى وزەن ارقىلى وتەتىن كوپىر شايىلىپ، قاتتى زاقىمدانعانىن اتاپ ءوتتى. سول جىلى قولدانىستاعى كوپىردى بولشەكتەۋ جۇمىستارى جۇرگىزىلدى. 2025 جىلدىڭ قاڭتارىندا جوبالاۋ-سمەتالىق قۇجاتتاما ازىرلەنىپ، ساراپتامانىڭ وڭ قورىتىندىسى الىندى. نىساننىڭ جالپى قۇنى — 3،2 ملرد تەڭگە. قايتا جاڭارتىلعان كوپىردىڭ ۇزىندىعى 280 مەتردى قۇرايدى.
ەسكە سالايىق، 2025 جىلدىڭ ناۋرىزىندا ۋيل اۋىلىنا تەك موتورلى قايىقپەن جەتۋگە بولاتىنى، سەبەبى ۋاقىتشا وتكەلدى سۋ شايىپ كەتكەنى حابارلانعان بولاتىن. كەيىن بيلىك تۇرعىندار ءۇشىن ۋاقىتشا كوپىردى قايتا سالاتىنىن مالىمدەدى.