«اكتوبە» فۋتبول كلۋبى قازاقستان پرەمەر-ليگاسىنىڭ 19-تۋرى اياسىندا ءوز الاڭىندا «وكجەتپەستى» جەڭىپ، تۋرنير كەستەسىندە ءۇشىنشى ورىنعا كوتەرىلدى، دەپ حابارلايدى infohub.kz سايتى.
قازاقستان چەمپيوناتىنىڭ ەليتالىق ديۆيزيونى 19-تۋرىندا ءۇش كەزدەسۋ ءوتىپ، بارلىعى بىردەي 2:1 ەسەبىمەن اياقتالدى.
«اكتوبە» ماۋسىمدى ءساتسىز باستاعانىمەن، باپكەر اۋىسقاننان كەيىن (بولگاريالىق نيكولاي كوستوۆتىڭ ورنىنا سلوۆاكيالىق شتەفان تاركوۆيچ كەلدى) بەس دۇركىن چەمپيون بىرتىندەپ فورماسىن تاپتى. ءبىرىنشى اينالىمنىڭ اشىلۋى بولعان «وكجەتپەسپەن» كەزدەسۋ الدىندا اقتوبەلىكتەر ءۇشىنشى ورىنداعى قارسىلاسىنان نەبارى ەكى ۇپاي كەيىن تۇرعان ەدى.
5-مينۋتتا-اق ماكەدونيالىق ياني اتاناسوۆ ستاندارتتىق جاعدايدان سوڭ ەسەپ اشتى. تايمنىڭ ورتاسىندا ءۇي يەلەرىنىڭ تاعى ءبىر بۇرىشتاپ سوققان دوبى تەمىرلان ەرلانوۆتىڭ گولىنا اكەلدى — 2:0. ءبىرىنشى تايمنىڭ سوڭىنا قاراي «وكجەتپەستىڭ» وزبەك جارتىلاي قورعاۋشىسى شاحبوز ۇماروۆ ايىرماشىلىقتى قىسقارتتى — 2:1. ەكىنشى تايمدا گول بولمادى.
بۇل جەڭىس «اكتوبەگە» كەستەدە «استانا» مەن «وكجەتپەستى» باسىپ وزۋعا مۇمكىندىك بەردى. الايدا، ەلوردالىق كلۋبتىڭ قورى ويىنى بار: ەرتەڭ «استانا» «التايدى» قابىلدايدى.
تۋردىڭ قالعان ەكى ماچى ۇقساس سەناريمەن ءوتتى: قوناقتار ەسەپ اشتى، ءۇي يەلەرى ەسەپتى تەڭەستىردى، سودان كەيىن شەشۋشى گول جىبەرىپ الدى. جەزقازعاندا « ۇلىتاۋ» «ەرتىسكە» (1:2) ەسە جىبەرسە، تالدىقورعاندا «جەتىسۋ» « قىزىلجاردان» (1:2) ۇتىلدى. جەڭىس گولدارىن پاۆلودارلىقتار ءۇشىن يۆۋاريالىق جان-مورەنو پوە، ال پەتروپاۆلدىقتار ءۇشىن كامەرۋندىق ستەفان باوكەن سوقتى. ايتا كەتەرلىگى، « قىزىلجار» الەكساندر سوكولەنكو الاڭنان شىعارىلعان سوڭ ون اداممەن ويناپ، شەشۋشى گولدى ەنگىزدى.
تۋردىڭ ورتالىق ماچى «قايرات» — «ورداباسى» 26 شىلدەدە وتەدى. سول كۇنى «توبىل» — «اتىراۋ»، «ەلىماي» — «قايسار»، «استانا» — «التاي» جانە «كاسپي» — «جەڭىس» ويىندارى دا وينالادى.