اقتوبەدە وتكەن جىلدىڭ جەلتوقسانىندا اناسى مەن اجەسىنە پىشاقپەن شابۋىل جاسادى دەگەن كۇدىككە ىلىنگەن 16 جاسار جەتكىنشەككە قاتىستى سوت پروسەسى باستالدى. ايەل العان جاراقاتىنان قايتىس بولدى، دەپ حابارلايدى infohub.kz.
ەسكە سالايىق، جەلتوقسان ايىنىڭ باسىندا وقۋشى اناسىن ءولتىرىپ، اجەسىنە شابۋىل جاسادى دەگەن كۇدىككە ىلىنگەنى بەلگىلى بولعان ەدى. پوليسيانىڭ حابارلاۋىنشا، كەزەكشى بولىمگە پاتەرلەردىڭ بىرىندە اسا اۋىر قىلمىس جاسالعانى تۋرالى حابارلاما تۇسكەن. وقيعا ورنىنا بارعان ءتارتىپ ساقشىلارى زورلىق-زومبىلىق بەلگىلەرى بار ايەلدىڭ ءمايىتىن تاپقان. سول پاتەردەن قارت ايەل پىشاق جاراقاتىمەن اۋرۋحاناعا جەتكىزىلگەن. كامەلەتكە تولماعان كۇدىكتى كىناسىن مويىنداپ، جاۋاپ بەرگەن.
كورشىلەر بولعان وقيعادان ەسەڭگىرەپ قالدى، ويتكەنى وتباسى اۋقاتتى ءارى تولىق بولىپ سانالاتىن، ءۇش بالا تاربيەلەپ وتىرعان. ۇستالعان ءجاسوسپىرىم — ۇلكەن ۇلى، ەكىنشى ۇلى ودان كىشى. ۇلكەن بالالار جەكە مەكتەپتە وقىعان، ال بەس جاسار كەنجەسى مەكتەپكە دايىندىق ساباقتارىنا بارعان. اتا-اناسى جۇمىس ىستەگەن، بالالار تاربيەلى ءارى اجەسىنە ءاردايىم كومەكتەسەتىن.
بۇگىن اقتوبەدە وسى ءىس بويىنشا سوت پروسەسى باستالىپ، سول قارالى كۇننىڭ ءمان-جايى ايتىلدى. ايىپتالۋشىلار وتىرعىشىندا 16 جاسار وقۋشى بولۋى كەرەك ەدى، الايدا تەلەارنانىڭ حابارلاۋىنشا، ول پسيحياتريالىق اۋرۋحانادا جاتىر. ساراپتاما ناتيجەسى بويىنشا وعان پارانويدتى شيزوفرەنيا دياگنوزى قويىلعان. ماماندار قىلمىس جاسالعان كەزدە ول ءوز ىس-ارەكەتىن سەزىنگەن جوق دەگەن قورىتىندىعا كەلگەن.
سوتقا ءجاسوسپىرىمنىڭ اكەسى مەن اجەسى كەلدى. ەكەۋى دە وزدەرىن تۇسىرمەۋدى سۇراپ، تۇسىنىكتەمە بەرۋدەن باس تارتتى. قاندى وقيعانىڭ ءمان-جايىن مەملەكەتتىك ايىپتاۋشى وقىپ شىقتى: «ءجاسوسپىرىم اس ۇيدە بولعان، اناسى وعان ۇلگەرىمى تۋرالى ەسكەرتۋ جاساعان. وسىدان كەيىن ول راكوۆينانىڭ ۇستىندەگى شكافتى اشىپ، قارا ساپتى پىشاقتى كورىپ، الىپ، ايەلدى باسقا بولمەگە دەيىن قۋعان. سول جەردە ول وعان دەنەسىنىڭ ءارتۇرلى جەرىنە بىرنەشە پىشاق جاراقاتىن سالعان. العان جاراقاتتارىنان اناسى وقيعا ورنىندا قايتىس بولعان».