اقتوبە وبلىسىنداعى ءىرى ءورتتى سوندىرۋگە جۇزدەن استام ادام، ۇشقىشسىز ۇشۋ اپپاراتى جانە Starlink جابدىعى جۇمىلدىرىلدى، دەپ حابارلايدى infohub.kz سايتى.
كەشە قارعالى اۋدانىنىڭ اششىلىساي اۋىلدىق وكرۋگىندە قۇرعاق ءشوپ ورتەندى. قاتتى جەلدىڭ سالدارىنان جالىن تەز تاراپ، شامامەن 83 گەكتار اۋماقتى شالدى.
تجم مالىمەتىنشە، ءورتتى سوندىرۋگە مينيسترلىكتىڭ كۇشى مەن قۇرالدارى، «اۋىل قۇتقارۋشىلارى» ەرىكتىلەرى، تجم 20982 اسكەري ءبولىمىنىڭ اسكەري قىزمەتشىلەرى، اۋىلدىق وكرۋگ اكىمدىكتەرىنىڭ وكىلدەرى، ەرىكتى ءورت ءسوندىرۋ قۇرامالارى جانە ورمان شارۋاشىلىعى قىزمەتكەرلەرى تارتىلدى. بارلىعى شامامەن 110 ادام مەن 20-دان استام تەحنيكا جۇمىس ىستەدى.
ۆەدومستۆونىڭ ايتۋىنشا، جاعدايدى باقىلاۋ ءۇشىن ۇشقىشسىز ۇشۋ اپپاراتى پايدالانىلدى، ال Starlink جابدىعى جۇمىسقا قاتىسۋشىلار اراسىندا جەدەل بايلانىستى قامتاماسىز ەتتى.
ءورت تولىعىمەن ءسوندىرىلدى، زارداپ شەككەندەر جوق. تجم تابيعي القاپتاردا ءورت قاۋىپسىزدىگى ەرەجەلەرىن ساقتاۋ قاجەتتىگىن ەسكە سالادى: ءورت ءقاۋىپتى كەزەڭدە وت جاعۋعا جانە قۇرعاق وسىمدىكتەردىڭ تۇتانۋىنا اكەلۋى مۇمكىن ارەكەتتەرگە تىيىم سالىنادى.