اقتوبە وبلىسىنىڭ تۇرعىنى تانىسىمەن بىرگە توي-دۋماننان كەيىن 1 ملن تەڭگەدەن ايىرىلدى. اقشا بانكتىك قوسىمشا ارقىلى اۋدارىلعان، دەپ حابارلايدى infohub.kz.
اقتوبە وبلىسىندا 41 جاستاعى ەر ادام تانىسىنىڭ شوتىنان 1 ملن تەڭگەنى ۇرلادى دەگەن كۇدىككە ءىلىندى. پوليسيانىڭ مالىمدەۋىنشە، ول بىرگە وتىرعان توي ۇستىندە باسقا ادامنىڭ سمارتفونىن پايدالانىپ، اقشانى ءوز شوتىنا اۋدارعان.
ىشكى ىستەر مينيسترلىگىنىڭ ۆەدومستۆولىق سايتىندا حابارلانعانداي، تەلەفون يەسى باسقا قوناقتارمەن سويلەسىپ وتىرعاندا، كۇدىكتى بايقاتپاي تەلەفوندى الىپ، بانك قوسىمشاسىن اشىپ، اقشانى ءوز شوتىنا اۋدارىپ جىبەرگەن.
زارداپ شەگۋشى اقشانىڭ جوعالعانىن بىرنەشە كۇن وتكەن سوڭ، بانك وپەراسيالارىنىڭ تاريحىن تەكسەرىپ كورگەندە عانا بىلگەن. سودان كەيىن ول پوليسياعا ارىزدانعان.
كۇدىكتىنى كوپ ۇزاماي انىقتاپ، پوليسيا بولىمىنە جەتكىزدى.
پوليسيانىڭ حابارلاۋىنشا، جاۋاپ الۋ كەزىندە ول كىناسىن مويىنداپ، ۇرلانعان اقشانى جەكە قاجەتتىلىكتەرىنە جۇمساپ ۇلگەرگەنىن ايتقان.
ۇرلىق فاكتىسى بويىنشا سوتقا دەيىنگى تەرگەۋ باستالدى.
پوليسيا تانىستار اراسىندا دا تەلەفوندى قاراۋسىز قالدىرۋعا جانە بوگدە ادامدارعا بەرۋگە بولمايتىنىن ەسكەرتتى.
«قازىرگى زامانعى سمارتفون — بۇل تەك بايلانىس قۇرالى عانا ەمەس، سونىمەن قاتار ءسىزدىڭ بانك شوتتارىڭىزعا كىرۋ مۇمكىندىگى. بىرنەشە سەكۋندتىق نەمقۇرايلىلىق وتە قىمباتقا ءتۇسۋى مۇمكىن، ال بىرەۋدىڭ اقشاسىن يەمدەنۋگە دەگەن ىنتا پايدا ەمەس، قىلمىستىق جاۋاپكەرشىلىككە اكەپ سوقتىرادى»، — دەپ اتاپ ءوتتى ۆەدومستۆودا.