اقتوبە 25-28 شىلدە ارالىعىندا ITTF World Para Future Aktobe 2026 حالىقارالىق ءتۋرنيرىن قابىلدايدى. 23 ەلدەن 200-گە جۋىق سپورتشى جۇلدەلەر مەن بەدەلدى رەيتينگتىك ۇپايلار ءۇشىن ب ا ق سىنايدى، دەپ حابارلايدى infohub.kz.
اقتوبە وبلىسى اكىمدىگىنىڭ مالىمەتىنشە، جارىسقا الەمنىڭ 23 ەلىنەن 200-گە جۋىق سپورتشى قاتىسادى. بۇل — قازاقستاندا وتەتىن پارا ۇستەل تەننيسىنەن وسى دەڭگەيدەگى ءۇشىنشى حالىقارالىق تۋرنير. بۇل ەلدىڭ بەيىمدەلگەن سپورتتى دامىتۋداعى ءرولىنىڭ ارتىپ كەلە جاتقانىن كورسەتەدى.
اكىمدىك وكىلدەرىنىڭ ايتۋىنشا، الداعى تۋرنير سپورتشىلاردى ءىرى الەمدىك جارىستارعا، ونىڭ ىشىندە 2028 جىلى لوس-اندجەلەستە وتەتىن پاراليمپيادا ويىندارى مەن تايلاندتا وتەتىن پارا ۇستەل تەننيسىنەن الەم چەمپيوناتىنا دايىنداۋدىڭ ماڭىزدى كەزەڭى بولادى.
ۇيىمداستىرۋشىلار مۇنداي بەدەلدى جارىستاردى وتكىزۋ سپورتتىڭ دامۋىنا عانا ەمەس، ايماقتىڭ الەۋمەتتىك-ەكونوميكالىق دامۋىنا دا وڭ اسەر ەتەتىنىن اتاپ وتەدى. شەتەلدىك سپورتشىلاردىڭ، جاتتىقتىرۋشىلاردىڭ، رەسمي تۇلعالار مەن قوناقتاردىڭ قاتىسۋى اقتوبەگە ءوز مادەنيەتى، تاريحى مەن قوناقجايلىلىق داستۇرلەرىن حالىقارالىق ارەنادا تانىستىرۋعا مۇمكىندىك بەرەدى دەپ كۇتىلۋدە. سونىمەن قاتار، بۇل وبلىستىڭ تۋريستىك تارتىمدىلىعىن ارتتىرىپ، ىشكى ءتۋريزمدى دامىتۋعا، ايماقتىڭ ءيميدجىن نىعايتۋعا جانە قازاقستاننىڭ جاڭا تۋريستىك باعىتتارىن ىلگەرىلەتۋگە ىقپال ەتەدى.
جارىستار ءتۋرنيردىڭ باستى الاڭى — «اقتوبە» ۇستەل تەننيسى ورتالىعىندا وتەدى. ۇيىمداستىرۋشىلار بۇگىندە اقتوبە قازاقستاننىڭ زاماناۋي سپورت ورتالىقتارىنىڭ ءبىرى ەكەنىن، جوعارى دەڭگەيدەگى حالىقارالىق جارىستاردى وتكىزۋگە جانە سپورت سالاسىنداعى ىنتىماقتاستىقتى دامىتۋعا قاجەتتى ينفراقۇرىلىمعا يە ەكەنىن اتاپ كورسەتەدى.