اقتوبەدە اۋدانى 7،4 مىڭ شارشى مەتردەن اساتىن تەمىرجول ۆوكزالىنىڭ رەكونسترۋكسياسى اياقتالدى، دەپ حابارلايدى infohub.kz.
«قازاقستان تەمىر جولى» كومپانياسىنىڭ مالىمەتىنشە، جاڭارتۋ تەمىرجول ۆوكزالدارىن جاڭعىرتۋ باعدارلاماسى اياسىندا جۇرگىزىلدى. جەرتولە جانە تەحنيكالىق قاباتتارى بار التى قاباتتى عيماراتتا جاڭا شاتىر، قاسبەت جانە ينجەنەرلىك جەلىلەر ورناتىلىپ، ىشكى بولمەلەر جوندەلدى. قاسبەت فيبروسەمەنتتى پليتالارمەن قاپتالدى.
عيماراتتا ليفتىلەر مەن ەسكالاتورلار ورناتىلىپ، جاڭا جيھاز بەن جابدىقتار ساتىپ الىندى. رەكونسترۋكسيادا قازاقستاندىق ءوندىرىس ماتەريالدارى قولدانىلدى. سونىمەن قاتار، ىرگەلەس اۋماق اباتتاندىرىلىپ، مۇمكىندىگى شەكتەۋلى جولاۋشىلارعا جاعداي جاسالدى.
اقتوبە تەمىرجول ۆوكزالى 1976 جىلى سالىنعان. ءقازىر ونىڭ تاۋلىكتىك جولاۋشىلار اعىنى 4،7 مىڭ ادامنان اسادى.
ستانسيا ارقىلى اقتوبەنى استانا، الماتى، ورال، ماڭعىستاۋ، بەينەۋ، تاراز، شۋ، شىمكەنت، تۇركىستان، قىزىلوردا، كوكشەتاۋ، قوستاناي، بۋراباي كۋرورتى جانە اتىراۋمەن بايلانىستىراتىن 34 جولاۋشىلار پويىزى وتەدى.
سونداي-اق ۆوكزال ارقىلى اقتوبەنى رەسەي، وزبەكستان، تاجىكستان جانە قىرعىزستان قالالارىمەن بايلانىستىراتىن حالىقارالىق باعىتتار دا وتەدى.
قتج-دا رەكونسترۋكسيا جولاۋشىلارعا قىزمەت كورسەتۋ ساپاسىن ارتتىرۋعا، قولايلى ءارى ءقاۋىپسىز جاعداي جاساۋعا، سونداي-اق تەمىرجول ينفراقۇرىلىمى نىسانىنىڭ سىرتقى كەلبەتىن جاڭارتۋعا باعىتتالعانىن اتاپ ءوتتى.
بۇعان دەيىن 2026 جىلى قازاقستاندا تاۋەلسىزدىك جىلدارىنداعى ەڭ ءىرى تەمىرجول ۆوكزالدارىن جاڭعىرتۋ باعدارلاماسى جۇزەگە اسىرىلاتىنى، ول بۇكىل ەل بويىنشا 124 نىساندى قامتيتىنى حابارلانعان بولاتىن. سونىمەن قاتار، قتج تەمىرجول جەلىسىن كەڭەيتىپ، لوكوموتيۆتەر مەن جولاۋشىلار ۆاگوندارىن جاڭارتۋدا: جىل باسىنان بەرى پارك 144 لوكوموتيۆكە تولىقتى، ال ون جىل ىشىندە 1 082 بىرلىك ساتىپ الۋ جوسپارلانۋدا.