اقتوبەدە توي كورتەجىنە قاتىسۋشىلار جول قوزعالىسى ەرەجەلەرىن ورەسكەل بۇزعانى ءۇشىن جاۋاپكەرشىلىككە تارتىلدى: جولاۋشىلار ادەمى كادر ءتۇسىرۋ ءۇشىن كولىك تەرەزەسىنەن سىرتقا شىعىپ، جۇرگىزۋشىلەر قاۋىپسىزدىك بەلبەۋىن تاقپاعان، دەپ حابارلايدى infohub.kz سايتى.
ءىىم ۆەدومستۆولىق سايتىنىڭ حابارلاۋىنشا، الەۋمەتتىك جەلىلەردى مونيتورينگىلەۋ بارىسىندا پوليسيا قىزمەتكەرلەرى توي كورتەجىنە قاتىسۋشىلاردىڭ جقە ورەسكەل بۇزعانىن كورسەتەتىن بەينەجازبانى انىقتاعان.
«جاريالانعان كادرلاردا جولاۋشىلار قوزعالىپ كەلە جاتقان كولىكتەردەن سىرتقا شىعىپ تۇر، ال جۇرگىزۋشىلەر ءجۇرىس كەزىندە تەلەفون قولدانىپ جاتىر. سونىمەن قاتار، جۇرگىزۋشىلەر قاۋىپسىزدىك بەلبەۋىن تاقپاعان. مۇنداي مىنەز-ق ۇلىق تەك كورتەجگە قاتىسۋشىلاردىڭ ومىرىنە عانا ەمەس، جول قوزعالىسىنىڭ باسقا دا قاتىسۋشىلارىنا ناقتى ءقاۋىپ توندىرەدى»، — دەپ حابارلادى پوليسيا.
پوليسيا قىزمەتكەرلەرى كورتەجگە قاتىسقان كولىك قۇرالدارىنىڭ جۇرگىزۋشىلەرى مەن جولاۋشىلارىن انىقتادى. بارلىق بۇزۋشىلار زاڭناماعا سايكەس جاۋاپكەرشىلىككە تارتىلدى. كولىك قۇرالدارىنىڭ ءبىرى ارنايى تۇراققا قويىلدى.
«مەرەكەلىك شارا جقە تالاپتارىن ەلەمەۋگە نەگىز بولمايدى. ادەمى ۆيدەو تۇسىرۋگە تىرىسۋ، كولىك تەرەزەسىنەن سىرتقا شىعۋ نەمەسە قاۋىپسىزدىك بەلبەۋىن تاقپاۋ قايعىلى جاعدايعا اكەلۋى مۇمكىن»، — دەپ ەسكە سالدى قۇقىق قورعاۋ ورگاندارى.