اقتوبە وبلىسىنىڭ جاباساق اۋىلىندا ءۇش جىل بۇرىن جوندەلگەن اۋىل كلۋبى جارىلىپ كەتتى. ەندى جەرگىلىكتى تۇرعىندار بيۋدجەت قاراجاتى قايدا جۇمسالعانىن انىقتاۋدى تالاپ ەتىپ وتىر، دەپ حابارلايدى infohub.kz سايتى.
كتك تەلەارناسىنىڭ دەرەگىنشە، كىتاپحانا مەن بالالار ۇيىرمەلەرى جۇمىس ىستەيتىن عيماراتتا وقۋشىلار دا شۇعىلدانادى. اۋىل تۇرعىندارى قابىرعالاردىڭ جارىلعانىن، ەسىكتەردىڭ دۇرىس جابىلمايتىنىن، ال توبەنىڭ كەيبىر بولىكتەرى كەز كەلگەن ساتتە قۇلاپ كەتۋى مۇمكىن دەپ قاۋىپتەنەتىنىن ايتىپ شاعىمدانىپ وتىر.
عيماراتتى كۇردەلى جوندەۋگە 62 ميلليوننان استام تەڭگە جۇمسالعان. ەندى جاباساق تۇرعىندارى اقشا قايدا كەتتى جانە مەردىگەر جۇمىستى قانشالىقتى ساپالى ورىندادى دەگەن سۇراققا جاۋاپ ىزدەپ وتىر. حالىق جاعدايدى انىقتاپ، كىنالىلەردى جاۋاپقا تارتۋدى تالاپ ەتۋدە.
الايدا شەنەۋنىكتەر كەپىلدىك مەرزىمى بۇرىننان ءوتىپ كەتكەنىن، ەندى وزدەرى قايتا جوندەۋگە دايىندالىپ جاتقانىن مالىمدەدى.
«جاباساق اۋىلدىق كلۋبىن اپاتتى دەپ ساناۋعا نەگىز جوق. قازىرگى تاڭدا اۋىلدىق كلۋب قالىپتى رەجيمدە جۇمىس ىستەپ تۇر. اعىمداعى جوندەۋ جۇرگىزۋ جوسپارلانۋدا»، — دەيدى ايتەكە بي اۋدانى مادەنيەت ءۇيىنىڭ ديرەكتورى ازامات ساتبەكوۆ.