اۋستراليانىڭ باتىس بولىگىندەگى پەرت قالاسىنىڭ ماڭىنداعى تانىمال جاعالاۋدا تاڭعى ءجۇزۋ كەزىندە ەر ادام اكۋلانىڭ شابۋىلىنان قازا تاپتى. وسىعان بايلانىستى بيلىك اق اكۋلانى ۇستاپ، ولتىرۋگە سيرەك كەزدەسەتىن رۇقسات بەردى. مارقۇمنىڭ دەنەسى ءالى تابىلعان جوق. شتات جاعالاۋىنداعى، سونىڭ ىشىندە استانا پەرتتەگى جاعالاۋلار اكۋلانى ىزدەۋ جالعاسىپ جاتقاندىقتان، كەمىندە جەكسەنبىگە دەيىن جابىق بولادى، دەپ حابارلايدى infohub.kz سايتى.
بۇل — باتىس اۋستراليادا وسى اپتاداعى ەكىنشى اكۋلا شابۋىلى ءارى بيىلعى ءۇشىنشى ولىمگە اكەلگەن وقيعا. پەرتتىڭ سولتۇستىگىندەگى سوررەنتو جاعالاۋىندا بولعان وقيعا اۋستراليادا جاعاجاي دەمالىسشىلارىنىڭ قاۋىپسىزدىگىن قالاي قامتاماسىز ەتۋ كەرەكتىگى تۋرالى پىكىرتالاستى قايتا جانداندىردى.
اۋستراليالىق حابار تاراتۋ كورپوراسياسىنىڭ (ABC) مالىمەتىنشە، ءجۇزۋشى — 63 جاستاعى گرەگ و'نيلل. ونىڭ وتباسى حابار تاراتۋشىعا بەرگەن مالىمدەمەسىندە: «گرەگ مۇحيتتى جاقسى كورەتىن، قۇمار ءجۇزۋشى، سپورت جانكۇيەرى، ادال قىزمەتكەر جانە جان-جاقتى جومارت، ءازىلقوي ادام رەتىندە تانىلدى»، — دەلىنگەن.
كۋاگەر دجەكي راپايك ABC-گە ەكى ەر ادام ءجۇزىپ جۇرگەنىن، ءبىراق تەك بىرەۋى عانا جاعاعا جەتكەنىن، ال سۋدا «قاندى داق» كورگەنىن ايتتى. تاعى ءبىر كۋاگەر WAtoday-گە ەر ادامدى اكۋلا «بالىقتاي لاقتىرىپ» جاتقانىن كورگەنىن جەتكىزدى. جۇرتشىلىق سول ۋاقىتتا ۇزىندىعى 2،5 مەتر (8 فۋت 2 ديۋيم) اكۋلانى كورگەنىن حابارلادى.
سوررەنتو ورنالاسقان پەرتتىڭ دجۋندالاپ اۋدانىنداعى بيلىك بارلىق جاعاجايلار «ساقتىق شاراسى رەتىندە» جابىلعانىن جانە كەمىندە جەكسەنبى كۇنى تۇسكە دەيىن جابىق قالاتىنىن مالىمدەدى. سەنبى كۇنى تۇسىرىلگەن سۋرەتتەردە جاعالاۋدى پوليسيا قايىعى مەن تىكۇشاعى كۇزەتىپ جۇرگەنى كورىندى.
اۋستراليادا اق اكۋلالار قورعالاتىن ءتۇر بولىپ تابىلاتىندىقتان، ءۇستاپ-ولتىرۋ بۇيرىقتارى سيرەك جانە داۋلى. باتىس اۋستراليانىڭ بالىق شارۋاشىلىعى ءمينيسترى دجەكي دجارۆيس اكۋلانى سەنبى كۇنى تاڭەرتەڭ سۋ پوليسياسى بايقاپ، «وقيعاعا قاتىسى بار اكۋلا ەكەنى ناقتى انىقتالعاننان» كەيىن وسىنداي «ەرەكشە قادامعا» بارعانىن ايتتى. مينيستر شابۋىلدىڭ «ەرەكشە جاعدايلارىنا» جانە «اكۋلانىڭ توندىرگەن قاۋپىنە» بايلانىستى بالىق شارۋاشىلىعى قىزمەتكەرلەرىنە اكۋلانى ۇستاۋ مۇمكىن بولسا، «جويۋعا» رۇقسات بەرگەنىن مالىمدەدى. ءدجارۆيستىڭ قوسۋىنشا، مۇنداي بۇيرىق باتىس اۋستراليادا سوڭعى 10 جىلدا العاش رەت بەرىلىپ وتىر، ول بۇيرىقتىڭ بۇرىنعىداي جاپپاي قىرۋ ەمەس ەكەنىن اتاپ ءوتتى. مينيستر سونداي-اق جاعاجاي دەمالىسشىلارىن قورعاۋعا كومەكتەسۋ ءۇشىن دروندار مەن تاڭبالاۋدى قولدانۋ كوبەيتىلەتىنىن ايتتى.
باتىس اۋستراليادا اكۋلالاردى ۇستاپ ءولتىرۋدىڭ ۇزاق جانە داۋلى تاريحى بار — 2014 جىلى ءبىرقاتار شابۋىلدان كەيىن شتات ۇكىمەتى جاپپاي قىرۋعا رۇقسات بەرگەندە ايلار بويى ۇلكەن نارازىلىقتار بولعان.
سوررەتوداعى وقيعا — باتىس اۋستراليادا وسى اپتاداعى ەكىنشى جاعداي: دۇيسەنبىدە 56 جاستاعى ەر ادام پەرتتەن 430 شاقىرىم (270 ميل) سولتۇستىكتە ورنالاسقان دجەرالدتون جاعالاۋىندا سەرفينگ كەزىندە تىستەلگەن. ونى قۇتقارعان تاعى ءبىر سەرفەردىڭ ABC-گە ايتۋىنشا، ول امان قالعان، ءبىراق اياعىنىڭ ءبىر بولىگىنەن ايىرىلعان.
بيىل اۋستراليادا اكۋلا شابۋىلىنان بەس ادام قازا تاپتى. قاڭتاردا 12 جاسار بالا سيدنەي ايلاعىندا تىستەلگەننەن كەيىن قايتىس بولدى، ال مامىر مەن ماۋسىم ارالىعىندا ءۇش سۇڭگۋىر جەكە-جەكە وقيعالاردا قازا تاپتى — ەكەۋى باتىس اۋستراليادا، ءۇشىنشىسى كۆينسلەندتە.