الاباما شتاتىنداعى سوت New York Times گازەتىن كوللەدج باسكەتبولشىسى تۋرالى جالعان اقپارات تاراتقانى ءۇشىن 9،25 ميلليون دوللار تولەۋگە مىندەتتەدى. بۇل تۋرالى infohub.kz حابارلايدى.
الاباما ۋنيۆەرسيتەتىنىڭ ەرلەر كومانداسىندا ويناعان كاي سپيرس 2023 جىلى گازەتكە سوتقا شاعىمدانعان ەدى. گازەت تەرگەۋگە جاقىن دەرەككوزگە سىلتەمە جاساپ، ونىڭ اتىس وقيعاسىنا قاتىسى بار كولىكتە بولعانىن جازعان. كەيىن New York Times رەداكتورلىق جازبادا قاتەلىگىن مويىنداپ، ماقالانى تۇزەتكەن.
سەگىز ادامنان تۇراتىن القابيلەر توعىز كۇنگە سوزىلعان سوت پروسەسىنەن كەيىن ۇكىم شىعاردى. ءسپيرستىڭ ادۆوكاتى مەتت گلوۆەر بۇل شەشىمگە ريزا ەكەنىن ءبىلدىرىپ، «بۇل ۇكىم بۇكىل ەلدەگى جۋرناليستيكانى جاقسارتادى» دەپ سەنەتىنىن ايتتى.
New York Times وكىلى چارلي شتادتلاندەر كوڭىلى قالعانىن جەتكىزدى. «القابيلەردىڭ Times گازەتىن ادال قاتەلىك ءۇشىن كىنالى دەپ تانۋى ءبىزدى رەنجىتتى. القابيلەرگە قىزمەتى ءۇشىن العىس ايتامىز، ءبىراق بۇل ۇكىم مەن وتەماقى مولشەرى زاڭعا قايشى جانە دالەلدەمەلەرمەن راستالماعان دەپ ەسەپتەيمىز»، — دەدى شتادتلاندەر.
2023 جىلدىڭ قاڭتارىندا بولعان اتىس وقيعاسىندا 23 جاستاعى ايەل قازا تاپقان. مەكتەپتىڭ تاعى ءۇش باسكەتبولشىسى سول جەردە بولعان. سپيرس ءوز شاعىمىندا جالعان اقپارات وعان ەموسيونالدىق كۇيزەلىس اكەلگەنىن جانە ونى ماڭگىلىككە قانىشەرمەن بايلانىستىرعانىن ايتقان.
ايتا كەتۋ كەرەك، New York Times سوڭعى 50 جىلدا اقش-تا ءوز ماقالاسىنا بايلانىستى جالا جابۋ ءىسىن جوعالتپاعان ەدى.