پروفەسسور كاكەن قامزين الاياقتار جىمقىرعان 32 ميلليون تەڭگەنىڭ تولىق جينالعانىن حابارلادى. بۇل تۋرالى ول Facebook پاراقشاسىندا جازدى.
ونىڭ ايتۋىنشا، ءبىر جارىم اي بۇرىن الاياقتارعا الدانىپ، ۇيىنەن ايىرىلىپ قالا جازداعان. 5 شىلدەدەن باستاپ ەل ىشىندە «جىلۋ» جيناۋ باستالىپ، وسى ۋاقىتقا دەيىن كوپشىلىكتىڭ قولداۋىمەن 9،5 ميلليون تەڭگە تۇسكەن.
بۇگىن، ءقامزيننىڭ سوزىنە قاراعاندا، ءاتى-جونىن اتاۋدى قالاماعان ءبىر ازامات جەتىسپەي تۇرعان 23 ميلليون تەڭگەنى قولما-قول اكەلىپ بەرگەن. «بۇل تەك قارجىلاي كومەك ەمەس، سەنىمنىڭ، بىرلىكتىڭ، مەيىرىمنىڭ شىنايى كورىنىسى. ول ازاماتقا اللا رازى بولسىن!» – دەپ جازدى پروفەسسور.
جينالعان قاراجات ساتىپ الۋشى وتباسىعا بەرىلىپ، ءۇيدى ءوز اتىنا قايتا راسىمدەۋ جۇمىستارى باستالماق.