قازاقستان ۇكىمەتى ءوز رەزەرۆىنەن جەتىسۋ وبلىسىنداعى الاكول كولىندە قورعانىس بوگەتىن سالۋعا 3 ملرد تەڭگە ءبولدى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى، دەپ حابارلايدى infohub.kz.
قارجىلاندىرۋ جالپى ۇزىندىعى 6 شاقىرىم بولاتىن قورعانىس بوگەتىن سالۋعا مۇمكىندىك بەرەدى. «ونىڭ 2،5 شاقىرىمى كوكتۇما اۋىلىنا، 3،5 شاقىرىمى اقشي اۋىلىنا تيەسىلى»، — دەپ ۇكىمەت ءتۇسىندىردى.
جاعالاۋدى نىعايتۋ بويىنشا بەلسەندى جۇمىستار 2025 جىلى باستالعان ەدى. سوندا 1،7 شاقىرىم ۋچاسكەدە ماماندار توپىراق جانە بەتون جۇمىستارىن جۇرگىزىپ، گابيون قۇرىلىمدارىن توسەپ، بەتكەيدى نىعايتتى.
بوگەت تەك تۇرعىن ۇيلەر مەن دەمالىس ايماقتارىن قورعاپ قانا قويماي، الاكولدىڭ تۋريستىك الەۋەتىن ودان ءارى دامىتۋعا سەرپىن بەرەدى. سوڭعى ەكى جىلدا قازاقستاننىڭ التى وڭىرىندە (اقمولا، اقتوبە، باتىس قازاقستان، قوستاناي، سولتۇستىك قازاقستان جانە پاۆلودار وبلىستارى) 243 شاقىرىمنان استام قورعانىس بوگەتتەرى سالىنىپ، نىعايتىلدى.
ۇكىمەت سۋ جانە تۋريستىك ينفراقۇرىلىمدى دامىتۋ جونىندەگى جوبالاردىڭ ىسكە اسىرىلۋى كابينەتتىڭ تۇراقتى باقىلاۋىندا ەكەنىن سەندىردى.