اباي وبلىسىندا الاكول كولىنىڭ جاعاسىندا ورنالاسقان دەمالىس بازاسىنىڭ اكىمشىلىگى وتباسىنا 100 مىڭ تەڭگە كولەمىندەگى الدىن الا تولەمدى قايتاردى، دەپ حابارلايدى infohub.kz سايتى.
ق ر ساۋدا جانە ينتەگراسيا مينيسترلىگى تۇتىنۋشىلاردىڭ قۇقىقتارىن قورعاۋ كوميتەتىنىڭ رەسمي سايتىندا حابارلانعانداي، 2026 جىلدىڭ تامىز ايىنىڭ باسىندا وتباسى اباي وبلىسى ماقانشى اۋدانىنداعى الاكول كولىنىڭ جاعاسىندا ورنالاسقان دەمالىس بازالارىنىڭ بىرىنە ساپار شەگۋدى جوسپارلاعان. الايدا وتباسى مۇشەلەرىنىڭ ءبىرىنىڭ دەنساۋلىعىنا بايلانىستى دەمالىستان باس تارتۋعا ءماجبۇر بولعان.
تۇتىنۋشىلار دەمالىس بازاسىنداعى بولمەنى برونداۋ ءۇشىن الدىن الا 100 مىڭ تەڭگە تولەگەن. ءبىراق تۋىنداعان جاعدايلارعا بايلانىستى ولار قىزمەتتى پايدالانا الماي، ورىنداۋشىعا برونداۋدى بولدىرماۋ تۋرالى حابارلاعان.
وسىعان قاراماستان، دەمالىس بازاسىنىڭ اكىمشىلىگى ىقتيمال شىعىندار مەن پايدا تاپپاۋ سەبەپتەرىن العا تارتىپ، اقشانى قايتارۋدان باس تارتقان.
ق ر «تۇتىنۋشىلاردىڭ قۇقىقتارىن قورعاۋ تۋرالى» زاڭىنا سايكەس، تۇتىنۋشىلاردىڭ قۇقىقتارىن شەكتەيتىن شارتتارعا ساتۋشىعا (دايىنداۋشىعا، ورىنداۋشىعا) شارت بۇزىلعان جاعدايدا كورسەتىلمەگەن تاۋار (جۇمىس، قىزمەت) ءۇشىن تولەنگەن اقشانى قايتارماۋ قۇقىعىن بەرۋ جاتادى.
تۇتىنۋشىلاردىڭ قۇقىقتارىن قورعاۋ ماقساتىندا اباي وبلىسى بويىنشا ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتى سوتقا دەيىنگى تالاپ-ارىزدى دايىنداۋعا كومەك كورسەتىپ، قازاقستان رەسپۋبليكاسىنىڭ زاڭناماسىنا سايكەس قۇقىقتاردى قورعاۋ ءتارتىبىن تۇسىندىرگەن.
تالاپ-ارىزدى قاراۋ ناتيجەسىندە دەمالىس بازاسىنىڭ اكىمشىلىگى تۇتىنۋشىلاردىڭ تالاپتارىن ەرىكتى تۇردە قاناعاتتاندىرىپ، الدىن الا تولەنگەن اقشانى تولىق كولەمدە قايتارعان.