كوك مايسا بەتەگەلى جەرىڭ قايدا؟
كۇمىستەي تولقىنداعان كولىڭ قايدا؟
ىڭ-جىڭ بوپ جەر قايىسقان ءتورت تۇلىكپەي،
جوڭكىلىپ، كوشىپ قونعان ەلىڭ قايدا؟
كوتەرگەن اق كيىزگە حانىڭ قايدا؟
قيعاش قاس، بيداي ءوڭدى حانىم قايدا؟
تۇنەرگەن سىرتقا ايبىندى ىرگەڭ ءبۇتىن،
ءبىر كەزدە باسقا قونعان باعىڭ قايدا؟
قاق جارعان قارا قىلدى ءبيىڭ قايدا؟
اق وردا بي تۇسەتىن ءۋيىڭ قايدا؟
سالتانات سارىارقادا قۇرعان قازاق،
تولىقسىپ جۇرگەن كەشە كۇنىڭ قايدا؟
شاڭ جۇتقان تەكەجاۋمىت اتىڭ قايدا؟
قالدىرماس جاۋعا تاستاپ جاقىن قايدا؟
ۇشقىر ات، ءتۇزۋ مىلتىق، بولات نايزا،
كيىنگەن كوك دۋلىعا باتىر قايدا؟
قامىعىپ كانعا تولعان جۇرەك قايدا؟
بۇرق ەتكەن ءبىر اۋىزدان تىلەك قايدا؟
جاياۋعا ات، جالاڭاشقا كيىم بولىپ،
قاراسقان ناشارىڭا كومەك قايدا؟
بەرمەيتىن ەل نامىسىن ەرىڭ قايدا؟
سۇيەنەر قىسىلعاندا بەلىڭ قايدا؟
ويتكەنى ايتقانى ەكى بولمايتۇعىن،
اسىل زات ارتىق تۋعان بەگىڭ قايدا؟
شالدىرماس توپتان تۋرا شەشەن قايدا؟
ۇلىقپەن ەل باستاعان كوسەم قايدا؟
قازاعىم، قازاكشىلىق قالپىڭ مەنەن
داڭعىل جول سايراپ جاتقان كوشەڭ قايدا؟
كەمەڭگەر دۇعالى اۋىز كارى قايدا؟
دەرتىڭە شيپا بولار ءدارى قايدا؟
ماسايراپ كىمگە سەنىپ قارىساسىڭ،
جاۋاپ بەر، وسىلاردىڭ ءبارى قايدا؟
جاۋاپ سول: ەتكەن داۋرەن قايتا كەلمەس،
قانشاما وكسىگەنمەن تاعدىر كونبەس.
بۇل كۇنگى قاراشىل قارت، پاراشىل بي
وتكەندەر كەلگەنمەن دە ورىن بەرمەس.
سويتكەنمەن، قازاق كوشىن وڭعا باستاپ،
ءجۇرۋدى وزدىگىنەن تاعى بىلمەس.
مەيلىڭ كون، مەيلىڭ، جىلا سوڭعىلارعا،
قايتسىن-اي، قامىقتى-اۋ دەپ، كوزىنە ىلمەس.
«ىشكەن ماس، جەگەن توقتىڭ» زامانى بۇل:
اشىققان، اششىنعانىڭ تۇككە جۇرمەس.
«مال قۇمار، مالدىڭ قولى» دەگەن اقىن،
كىم قاقسا «جەمتىگىنەن» سوعان كۇندەس.
الاشىم، ايتقاندى الساڭ، بەز بۇلاردان:
ەش نارسە ءتاۋىپ بەرمەس، بىلگەنگە ەرمەس.
قوي باعىپ قاسقىر قاشان وپا قىلعان،
كورە بەر ءوز بەتىڭمەن كۇنىڭدى ولمەس.
قايراعان قولدان كەلمەس ىسكە اۋرە بوپ،
قورلىققا، ءتىلىمدى الساڭ، بولما كەزدەس!

---