قازاقستاندىقتار «وردا ايماق» جانە «وردا ايماق پليۋس» جەڭىلدىكتى يپوتەكالىق باعدارلامالارى بويىنشا كەڭەس الىپ، قۇجاتتاردى Alatau City Bank بولىمشەلەرىندە تاپسىرا الادى. ءتيىستى ىنتىماقتاستىق كەلىسىمىن «قازاقستاندىق تۇرعىن ءۇي كومپانياسى» («بايتەرەك» حولدينگىنىڭ ەنشىلەس قۇرىلىمى) جانە بانك جاساستى، دەپ حابارلايدى infohub.kz سايتى.
كەلىسىم اياسىندا Alatau City Bank الەۋەتتى قارىز الۋشىلارعا باعدارلامالاردىڭ شارتتارى بويىنشا كەڭەس بەرىپ، قاجەتتى قۇجاتتاردى قابىلداپ، تەكسەرەدى، نەسيە وتىنىمدەرىن راسىمدەپ، ودان ءارى قاراۋ ءۇشىن قتك-عا جىبەرەدى. بۇل ازاماتتارعا تۇرعىن ءۇي نەسيەسىن الۋ پروسەسىن ىڭعايلى ءارى قولجەتىمدى ەتەدى.
«بانك-سەرىكتەستەرمەن ىنتىماقتاستىق ازاماتتارعا تۇرعىن ءۇي نەسيەسىن الۋ پروسەسىن ىڭعايلى ءارى تۇسىنىكتى ەتۋگە مۇمكىندىك بەرەدى. كەلىسىم اياسىندا Alatau City Bankء-تىڭ وڭىرلىك كەڭسەلەرى الەۋەتتى قارىز الۋشىلارمەن ءوزارا ءىس-قيمىلدىڭ قوسىمشا نۇكتەسىنە اينالادى – كەڭەس بەرۋدەن باستاپ قۇجات قابىلداۋعا دەيىن، قاجەتتى شارتتاردى راسىمدەۋگە دەيىن»، – دەپ اتاپ ءوتتى قتك باسشىسى التاي قۇزدىبايەۆ.
«وردا ايماق» جانە «وردا ايماق پليۋس» باعدارلامالارى استانا، الماتى جانە شىمكەنتتەن باسقا قازاقستاننىڭ بارلىق وڭىرلەرىندە قتك كەپىلدىگى بار ۇلەستىك قاتىسۋمەن سالىنىپ جاتقان بارلىق نىساندارعا قولدانىلادى. «وردا ايماق» باعدارلاماسى بويىنشا مولشەرلەمە جىلدىق 15،9% قۇرايدى (ناس 16،97%-دان 18،32%-عا دەيىن). «وردا ايماق پليۋس» ءۇشىن ناس باستاپقى جارناعا بايلانىستى 11،70%-دان 16،20%-عا دەيىن وزگەرەدى. ەكى باعدارلاما بويىنشا دا باستاپقى جارنا كەمىندە 20% بولۋى كەرەك، نەسيە سوماسى – 2-دەن 75 ميلليون تەڭگەگە دەيىن، مەرزىمى – 24-تەن 240 ايعا دەيىن (20 جىلعا دەيىن).
ەسكە سالايىق، مامىر ايىندا «قازاقستاندىق تۇرعىن ءۇي كومپانياسى» قۇرىلىس سالۋشىلارعا ۇلەسكەرلەردىڭ قاراجاتىن مەنشىكتى كەپىلدىكپەن جانە جاڭا «وردا ايماق» يپوتەكاسىمەن تارتۋدى ۇسىناتىنى بەلگىلى بولدى. سونىمەن قاتار، 1 قىركۇيەكتەن باستاپ «وردا ايماق» يپوتەكاسىنىڭ شارتتارى وزگەرەدى: ونى قوسىمشا م ۇلىك ۇسىنباي-اق، سالىنىپ جاتقان پاتەردىڭ ءوزىن كەپىلگە قويۋ ارقىلى الۋعا بولادى. ماۋسىم ايىنان باستاپ ەلىمىزدە سالىنىپ جاتقان تۇرعىن ءۇي كەشەندەرىندەگى پاتەرلەردى ساتىپ الۋعا باعىتتالعان «وردا ايماق پليۋس» وڭىرلىك باعدارلاماسى دا جۇمىس ىستەيدى.