قازاقستاننىڭ ءبىرىنشى راكەتكاسى الەكساندر بۋبليك اۋستريانىڭ كيسبيۋەل قالاسىندا ءوتىپ جاتقان كاسىبي تەننيسشىلەر قاۋىمداستىعىنىڭ (ATP) 250 ساناتىنداعى ءتۋرنيرىنىڭ ەكىنشى اينالىمىندا جەڭىسكە جەتتى، دەپ حابارلايدى infohub.kz سايتى.
الەمدىك رەيتينگتە 11-ورىندا تۇرعان جانە تۋرنيردە ءبىرىنشى نومىردەگى سەبىلگەن سپورتشى ەكىنشى اينالىمدا ارگەنتينالىق فاكۋندو دياس اكوستامەن (الەمدىك رەيتينگتە 108-ورىن) كەزدەستى. ماچ ەكى سەتكە سوزىلىپ، بۋبليكتىڭ 6:3، 7:5 ەسەبىمەن جەڭىسىمەن اياقتالدى.
تەننيسشىلەر كورتتا 1 ساعات 20 مينۋت وتكىزدى. وسى ۋاقىت ىشىندە الەكساندر سەگىز ەيس جاساپ، ءبىر قوس قاتەلىك جىبەرىپ، جەتى برەيك-پوينتتىڭ ەكەۋىن پايدالاندى.
جارتىلاي فينالعا شىعۋ ءۇشىن بۋبليك سلوۆاكيالىق الەكس مولچان مەن نەمىس دانيەل التمايەر اراسىنداعى كەزدەسۋدىڭ جەڭىمپازىمەن وينايدى.