بيىلعى جىلدىڭ باسىنان بەرى الەۋمەتتىك مەديسينالىق ساقتاندىرۋ قورى مەديسينالىق قىزمەت كورسەتۋشىلەرگە تەگىن مەديسينالىق كومەكتىڭ كەپىلدىك كولەمى جانە مىندەتتى الەۋمەتتىك مەديسينالىق ساقتاندىرۋ اياسىندا 1،6 تريلليون تەڭگە باعىتتادى. بۇل رەتتە قاراجاتتىڭ جارتىسىنا جۋىعى كلينيكالاردى اۆانستاۋعا جۇمسالدى، دەپ حابارلايدى infohub.kz.
قوردىڭ رەسمي سايتىندا جاريالانعان مالىمەتكە سايكەس، جالپى سومانىڭ 864،4 ميلليارد تەڭگەسى كورسەتىلگەن كومەككە اقى تولەۋگە، ال 731،8 ميلليارد تەڭگەسى مەديسينالىق ۇيىمداردى اۆانستاۋعا جۇمسالدى.
قوردا اتاپ وتكەندەي، تولەمگە 1،186 تريلليون تەڭگە سوماسىنداعى اكتىلەر قابىلدانعان، بۇل قارجىلاندىرۋدىڭ جىلدىق جوسپارىنىڭ 53 پايىزعا ورىندالۋىن قامتاماسىز ەتتى.
اكتىلەردىڭ كەشىگۋى ماسەلەسىن شەشۋ ءۇشىن ۆەدومستۆو تولەمدەردى جاڭا سيفرلىق Qalqan پلاتفورماسىنا اۋىستىرا باستادى. بولشەكتەپ اكتىلەۋدىڭ ارقاسىندا راستالعان كولەمدەردى ايدىڭ جالپى اكتىسى جابىلعانشا كۇتپەي-اق، مەديسينالىق كومەكتىڭ جەكەلەگەن تۇرلەرى بويىنشا تولەۋگە بولادى، دەپ ءتۇسىندىردى قوردا.
27 تامىزداعى جاعداي بويىنشا Qalqan ارقىلى 4 ميلليارد تەڭگە سوماسىنداعى العاشقى تولەمدەر جۇرگىزىلدى.
الدىڭعى كۇنى Qalqan سيفرلىق پلاتفورماسىنىڭ پيلوتتىق جوباسى 16 مەديسينالىق ۇيىمعا دەيىن كەڭەيتىلگەنى بەلگىلى بولدى. جۇيە مەديسينالىق كومەكتى جوسپارلاۋدى، ساتىپ الۋدى، مونيتورينگتى جانە تولەمدى بىرىكتىرۋى ءتيىس. بارلىق پروسەستەردى تولىق سيفرلاندىرۋدى اعىمداعى جىلدىڭ سوڭىنا دەيىن اياقتاۋ جوسپارلانۋدا.
بۇعان دەيىن قازاقستاندا ءمامس جۇيەسىندە قارجىلىق باقىلاۋ ءتاسىلى وزگەرىپ جاتقانى حابارلانعان بولاتىن. ءمامس رەفورماسى بيىلعى جىلدىڭ اقپان ايىندا الەۋمەتتىك مەديسينالىق ساقتاندىرۋ قورى قارجى مينيسترلىگىنىڭ قاراماعىنا بەرىلگەننەن كەيىن باستالدى. وزگەرىستەردىڭ باستى قاعيداتتارىنىڭ ءبىرى — تولەمدەردەن كەيىنگى تەكسەرۋلەردەن بۇرىن بۇزۋشىلىقتاردىڭ الدىن الۋعا كوشۋ.