قازاقستاندىقتاردىڭ 86%-دان استامى پرەزيدەنتكە سەنىم ارتادى. بۇل – قازاقستاندىق قوعامدىق دامۋ ينستيتۋتى (ققدي) ۇسىنعان الەۋمەتتىك ساۋالناما دەرەكتەرى، دەپ حابارلايدى infohub.kz.
2026 جىلعى 17 شىلدەدە استانادا قازاقستاندىق قوعامدىق دامۋ ينستيتۋتى (ققدي) «Sarap» ساراپشىلار كلۋبىنىڭ «ەلەكتورالدى لاندشافت-2026: قوعامدىق كۇتۋلەر مەن سايلاۋ تەندەنسيالارى» تاقىرىبىندا وتىرىسىن وتكىزدى. ءىس-شاراعا ساراپشى-اكادەميالىق قاۋىمداستىق وكىلدەرى، عىلىمي-زەرتتەۋ ينستيتۋتتارى مەن اناليتيكالىق ۇيىمداردىڭ باسشىلارى، جەتەكشى جوعارى وقۋ ورىندارىنىڭ دوكتورانتتارى مەن ماگيسترانتتارى قاتىستى. قاتىسۋشىلار جاڭا كونستيتۋسيا جاعدايىندا قۇرىلتاي سايلاۋى قارساڭىنداعى قوعامدىق كۇتۋلەردى، پارتيالىق قۇرىلىمداردىڭ ءرولىن كۇشەيتۋدى، ازاماتتاردىڭ سايلاۋ پروسەستەرىنە تارتىلۋىن ارتتىرۋدى تالقىلادى.
وتىرىس بارىسىندا ءققدي-دىڭ ەكى زەرتتەۋىنىڭ ناتيجەلەرى ۇسىنىلدى: «2026 جىلدىڭ II توقسانىنداعى قوعامدىق-ساياسي احۋال» (2400 رەسپوندەنت) جانە «قازاقستاندىقتاردىڭ ساياسي باعدارلارى» (1200 رەسپوندەنت). «بىر-بىرىنە تاۋەلسىز ەكى زەرتتەۋدىڭ كورسەتكىشتەرى سالىستىرمالى ناتيجەلەردى كورسەتىپ، سايلاۋ كەزەڭى جوعارى قوعامدىق كونسوليداسيا، وپتيميزم جانە مەملەكەتتىك ينستيتۋتتارعا تۇراقتى سەنىم جاعدايىندا باستالاتىنىن ايعاقتايدى»، — دەلىنگەن حابارلامادا.
ءبىرىنشى زەرتتەۋگە سايكەس، ەلىمىزدەگى قوعامدىق-ساياسي احۋالدى قولايلى نەمەسە تۇراقتى دەپ قازاقستاندىقتاردىڭ 84،1%-ى باعالايدى، بۇل I توقسانداعى كورسەتكىشتەن (70،4%) ايتارلىقتاي جوعارى. «ساۋالناما وپتيميستىك قوعامدىق كوڭىل-كۇيدىڭ نىعايۋىن كورسەتەدى. ءوز كوڭىل-كۇيىن تاماشا نەمەسە قالىپتى دەپ باعالايتىن ازاماتتاردىڭ ۇلەسى 88،5%-عا دەيىن ءوستى، ال مازاسىزدىق سەزىمىندەگىلەردىڭ ۇلەسى 15،2%-دان 11،5%-عا تومەندەدى. ومىرگە قاناعاتتانۋ 85،8%-عا جەتتى. رەسپوندەنتتەردىڭ جارتىسىنان استامى (50،5%) سوڭعى ءبىر جىلدا وتباسىنىڭ ماتەريالدىق جاعدايى جاقسارعانىن اتاپ ءوتتى، ال الداعى جىلى وڭ وزگەرىستەر كۇتەتىندەردىڭ ۇلەسى 60،1%-عا ءوستى»، — دەپ قوستى ينستيتۋتتا.
تۇراقتى وڭ كوزقاراستاردى جاستار كورسەتەدى. 18–28 جاس ارالىعىنداعى قازاقستاندىقتاردىڭ 87،1%-ى قوعامدىق-ساياسي احۋالدى قولايلى نەمەسە تۇراقتى دەپ باعالايدى — بۇل بارلىق جاس توپتارى اراسىنداعى ەڭ جوعارى كورسەتكىش. جاستار بولاشاققا دەگەن وپتيميستىك كوزقاراسىمەن دە ەرەكشەلەنەدى: الداعى جىلى ءومىرىنىڭ جاقسارۋىن جاس رەسپوندەنتتەردىڭ 65،6%-ى كۇتەدى.
«مەملەكەتتىك ينستيتۋتتارعا دەگەن سەنىمنىڭ سەرپىندى ءوسىمى بايقالادى. 2026 جىلدىڭ II توقسانىندا پرەزيدەنتكە سەنىم 86،9%-دى قۇرادى. بۇل كورسەتكىش بارلىق جاس توپتارىنا ءتان، بۇل جەكەلەگەن الەۋمەتتىك-دەموگرافيالىق ساناتتارمەن شەكتەلمەيتىن كەڭ قوعامدىق قولداۋدى كورسەتەدى»، — دەپ اتاپ ءوتتى ققدي-دا.
«قازاقستاندىقتاردىڭ ساياسي باعدارلارى» زەرتتەۋىنە سايكەس، الداعى قۇرىلتاي سايلاۋىنا قاتىسۋعا دايىن ەكەندىكتەرىن رەسپوندەنتتەردىڭ 75،1%-ى ءبىلدىردى. قاتىسۋعا بەرىك نيەت بىلدىرگەندەر 37،6%-دى قۇرادى، تاعى 37،5%-ى «ءيا، مۇمكىن» نۇسقاسىن تاڭدادى. «ەڭ جوعارى سايلاۋ دايىندىعىن ەگدە بۋىن وكىلدەرى كورسەتەدى (80،7%)، جاستار اراسىندا بۇل كورسەتكىش 69،4%-دى قۇرايدى. سايلاۋعا قاتىسۋعا دايىندىق جوعارى ءبىلىمدى ازاماتتار مەن اۋىل تۇرعىندارى اراسىندا دا جوعارى»، — دەپ حابارلادى ينستيتۋتتا.
وتىرىس قورىتىندىسىن شىعارا وتىرىپ، قاتىسۋشىلار الداعى قۇرىلتاي سايلاۋى ەلىمىزدىڭ ساياسي جۇيەسىنىڭ دامۋىنىڭ جاڭا كەزەڭىن باستايتىنىن اتاپ ءوتتى. بۇل – قوعامدا كۇتىلەتىن نەگىزگى وقيعالاردىڭ ءبىرى، قازاقستانداعى وكىلدى بيلىكتىڭ ودان ءارى ينستيتۋسيوناليزاسياسىنىڭ پەرسپەكتيۆالارىن كورسەتەدى. قازاقستاندىق قوعامدىق دامۋ ينستيتۋتى سايلاۋ ناۋقانى كەزەڭىندە قوعامدىق پىكىر ساۋالنامالارىن جۇرگىزۋ ءۇشىن قازاقستان رەسپۋبليكاسىنىڭ ورتالىق سايلاۋ كوميسسياسىمەن اككرەديتتەلگەن.