ۇلىتاۋ وبلىسىندا اليمەنت تولەمەگەن 22 بورىشكەر انىقتالدى. ولار ءوز بالالارىنا قاراجات ءبولۋدىڭ ورنىنا بۋكمەكەرلىك پلاتفورمالاردا ستاۆكا جاساعان، دەپ حابارلايدى infohub.kz سايتى.
باس پروكۋراتۋرانىڭ رەسمي Telegram-ارناسىنىڭ مالىمەتىنشە، اتا-انالىق مىندەتتەرىن ورىنداماي، اليمەنت بويىنشا قارىزى بار تۇرعىندار ويىن شوتتارىن تولىقتىرىپ، ستاۆكا جاساپ، ۇتىس الىپ وتىرعان.
ماسەلەن، ءبىر بورىشكەردىڭ اليمەنت بويىنشا بەرەشەگى 3،9 ملن تەڭگە بولعان. ول 2020 جىلدان بەرى بۋكمەكەرلىك كەڭسەدە تىركەلىپ، جەكە شوتىنا 4،6 ملن تەڭگە اۋدارىپ، 3،1 ملن تەڭگە ۇتىس العان. ال بالالارىن اسىراۋعا قاراجات بولمەگەن.
انىقتالعان دەرەكتەر بويىنشا قىلمىستىق كودەكستىڭ 139-بابى (بالالاردى اسىراۋعا ارنالعان قاراجاتتى تولەۋدەن جالتارۋ) بويىنشا سوتقا دەيىنگى تەرگەۋ باستالدى.