2026 جىلعى 25 تامىزدان باستاپ قازاقستاندا اليمەنتتەردى اۋدارۋدىڭ جاڭا ءتارتىبى كۇشىنە ەنەدى. اتقارۋ قۇجاتتارى بويىنشا قاراجات تەك ارنايى بانكتىك شوتتارعا تۇسەتىن بولادى، دەپ حابارلايدى infohub.kz سايتى.
وزگەرىستەر 2026 جىلعى 24 ماۋسىمداعى №325-VIII زاڭدا قاراستىرىلعان. بۇل زاڭ اتقارۋشىلىق ءىس جۇرگىزۋ تۋرالى زاڭناماعا وزگەرىستەر ەنگىزەدى. قۇجات جاڭا 102-1-باپپەن تولىقتىرىلدى.
جاڭا ەرەجەلەرگە سايكەس، اليمەنت الۋشى ارنايى بانكتىك شوت اشىپ، ونىڭ دەرەكتەمەلەرىن سوت ورىنداۋشىسىنا تاپسىرۋى ءتيىس. وندىرىلگەن قاراجات تەك وسىنداي شوتقا اۋدارىلادى.
ادىلەت مينيسترلىگىنىڭ تۇسىندىرۋىنشە، جاڭاشىلدىقتىڭ باستى ماقساتى – بالالار مەن ەڭبەككە جارامسىز ادامداردى اسىراۋعا ارنالعان اقشانى قورعاۋ. ارنايى اليمەنتتىك شوتتاعى قاراجاتقا تىيىم سالۋعا بولمايدى. بۇل اليمەنتتەردىڭ تەك ماقساتتى تۇردە جۇمسالۋىنا جانە الۋشىنىڭ باسقا قارىزدارىنا بايلانىستى زارداپ شەكپەۋىنە كەپىلدىك بەرەدى.
ارنايى شوت اشۋ ءۇشىن اليمەنت الۋشى بانككە جەكە كۋالىگىن، شوتتىڭ ماقساتىن كورسەتەتىن ءوتىنىشىن، سونداي-اق اليمەنت ءوندىرىپ الۋ تۋرالى سوت اكتىسىنىڭ كوشىرمەسىن نەمەسە ولاردى تولەۋ تۋرالى نوتاريالدى كۋالاندىرىلعان كەلىسىمدى ۇسىنۋى قاجەت. بانك مۇنداي شوتتى تولەمدەردىڭ ماقساتىن كورسەتە وتىرىپ، ارنايى دەپ بەلگىلەيدى.
ارنايى شوتتىڭ بولماۋى تولەۋشىنى اليمەنت تولەۋ مىندەتىنەن بوساتپايدى. الايدا ءوندىرىپ الۋشى شوت اشىپ، ونىڭ دەرەكتەمەلەرىن بەرمەيىنشە، وندىرىلگەن اقشانى اۋدارۋ مۇمكىن بولمايدى.
بۇل جاعدايدا سوت ورىنداۋشىسى الۋشىعا شوت اشۋ قاجەتتىگى تۋرالى حابارلاۋعا مىندەتتى. دەرەكتەمەلەر ۇسىنىلعاننان كەيىن قاراجات بەلگىلەنگەن تارتىپپەن اۋدارىلادى، ال اليمەنت بويىنشا بەرەشەك ەسەپتەلە بەرەدى جانە ەسەپتەن شىعارىلمايدى.
ادىلەت مينيسترلىگىنىڭ باعالاۋىنشا، جاڭا نورمالار اليمەنت الۋشىلاردىڭ قورعانىسىن كۇشەيتىپ، اتقارۋشىلىق ءىس جۇرگىزۋدىڭ تيىمدىلىگىن ارتتىرىپ، بالالار مەن ەڭبەككە جارامسىز ازاماتتاردى اسىراۋعا ارنالعان قاراجاتتىڭ ساقتالۋىن قامتاماسىز ەتۋى ءتيىس.