قازاقستاندىق تۇرعىن بالالارىنىڭ اكەسىنىڭ جالاقىسىنان ۇستالعان، ءبىراق الۋشىعا جەتپەگەن اليمەنتتەردى جۇمىس بەرۋشىدەن ءوندىرىپ الۋعا سوت ارقىلى قول جەتكىزدى. كومپانيانىڭ شوتتارىنا تىيىم سالىنعاندىقتان، اقشا الۋشىعا اۋدارىلماعان. ادىلدىك تەك كاسساسيالىق ساتىدا قالپىنا كەلتىرىلدى، دەپ حابارلايدى infohub.kz.
سوت ءباسپاسوز قىزمەتىنىڭ مالىمەتىنشە، جۇمىس بەرۋشى قىزمەتكەردىڭ جالاقىسىنان كامەلەتكە تولماعان بالالارىنا اليمەنت رەتىندە 513 362 تەڭگە ۇستاعان. الايدا بۇل قاراجاتتى الۋشىعا اۋدارۋ مۇمكىن بولماعان، سەبەبى ج ش س شوتتارىنا تىيىم سالىنعان. سونىمەن قاتار، 2025 جىلعى 1 قىركۇيەكتەگى جاعداي بويىنشا اكەسىنىڭ اليمەنت بويىنشا بەرەشەگى 1،1 ملن تەڭگەنى قۇراعان. سوت ورىنداۋشىسىنىڭ تالاپتارىن ورىنداماعانى ءۇشىن كومپانيانىڭ لاۋازىمدى تۇلعاسى اكىمشىلىك جاۋاپكەرشىلىككە تارتىلعان.
ايەل سوتقا جشس-دەن ۇستالعان، ءبىراق اۋدارىلماعان اليمەنتتەردى جانە تۇراقسىزدىق ايىبىن ءوندىرۋ تۋرالى تالاپ قويۋمەن جۇگىنگەن. الايدا ءبىرىنشى ساتىداعى سوتتار ونىڭ تالابىن قاناعاتتاندىرۋدان باس تارتىپ، جۇمىس بەرۋشى اليمەنت بويىنشا بورىشكەر بولىپ تابىلمايدى جانە ءوندىرىپ الۋشى الدىندا ماتەريالدىق جاۋاپكەرشىلىك كوتەرمەيدى دەپ ۋاجدەگەن.
كاسساسيالىق سوت بۇل ۇستانىممەن كەلىسپەگەن. سۋديالار جۇمىس بەرۋشى ۇستالعان اليمەنتتەردى جالاقى تولەنگەن كۇننەن باستاپ ءۇش كۇننەن كەشىكتىرمەي الۋشىعا اۋدارۋعا مىندەتتى ەكەنىن اتاپ وتكەن. مۇنداي قاراجاتتى اۋدارۋدى كەشىكتىرگەنى ءۇشىن جاۋاپكەرشىلىك ۇيىمنىڭ لاۋازىمدى تۇلعاسىنا جۇكتەلەدى.
«قىزمەتكەردىڭ جالاقىسىنان اليمەنت ۇستالعاننان كەيىن بۇل اقشا وعان تيەسىلى بولۋدان قالادى جانە جۇمىس بەرۋشىنىڭ مۇلكىنە اينالمايدى. ولار ماقساتتى تاعايىنداۋعا يە جانە مىندەتتى تۇردە الۋشىعا اۋدارىلۋعا ءتيىس. زاڭدى تۇلعانىڭ شوتتارىندا تىيىم سالۋلار مەن وزگە دە اۋىرتپالىقتاردىڭ بولۋى جۇمىس بەرۋشىنى بۇل مىندەتتەن بوساتپايدى. ۇستالعان اليمەنتتەر اۋدارىلماعاندىقتان، جۇمىس بەرۋشىنىڭ مىندەتتەمەسى الۋشى الدىندا جەكە اقشالاي بەرەشەككە اكەپ سوقتى. وسىعان بايلانىستى تالاپكەر تىكەلەي ۇيىمنان ءوندىرىپ الۋدى تالاپ ەتۋگە قۇقىلى»، — دەپ ءتۇسىندىردى سوتتا.
ناتيجەسىندە سوت جشس-دەن الۋشىنىڭ پايداسىنا 513 362 تەڭگە ۇستالعان، ءبىراق اۋدارىلماعان اليمەنتتەردى، سونداي-اق 168 690 تەڭگە تۇراقسىزدىق ايىبىن ءوندىردى. سونىمەن قاتار، ۇيىمنان 10 230 تەڭگە مەملەكەتتىك باج ءوندىرىلدى.