قازاقستاندىق بوكسشى جانىبەك اليمحان ۇلى سۋپەرورتا سالماق دارەجەسىنە وتكەننەن كەيىن مەكسيكالىق ساۋل «كانەلو» الۆارەسكە ۇندەۋ جاسادى، دەپ حابارلايدى infohub.kz.
اليمحان ۇلى Instagram Stories-تە «كانەلوعا» ارنالعان جازبا جاريالادى: «„كانەلو“، مەن سەنىڭ سالماعىڭا كوشتىم! سەنىمەن ارادا جابىلماعان ماسەلە بار».
بۇعان دەيىن قازاقستاندىق بوكسشى ءوز پاراقشاسىندا جاڭا سالماق دارەجەسىنە وتەتىنىن مالىمدەگەن ەدى. ول ورتا سالماقتا بەلبەۋلەردى جەڭىپ العانىن جانە ءارى قاراي جىلجۋدى كوزدەيتىنىن ايتتى: «ءبىز بۇل جولدى سۋپەرورتا سالماقتا جالعاستىرامىز! بۇل دارەجەدە اتاقتى بوكسشىلار از ەمەس. بۇرىن مەنىڭ سالماعىمدا ونەر كورسەتكەن كوپتەگەن بوكسشى ءقازىر سۋپەرورتا سالماقتا ءجۇرىپ، چەمپيون اتانىپ جاتىر. ەندەشە، ولاردى دا ازداپ مازالايتىن كەز كەلدى».
ەسكە سالايىق، وسىعان دەيىن دۇنيەجۇزىلىك بوكس ۇيىمىنىڭ (WBO) باسشىسى گۋستاۆو وليۆەري The Ring باسىلىمىنا اليمحان ۇلىنىڭ ورتا سالماقتاعى WBO تيتۋلىنان باس تارتىپ، سۋپەرورتا سالماققا كوشەتىنىن مالىمدەگەن بولاتىن.