InfoHub Logo

كراسنوۆودسك اۋداندىق "جۇمىسشى" گازەتىندە قىزمەت ىستەپ جۇرگەن كەزىمىز. ءبىر جىلدارى اتەيستىك تاربيەگە قاتتى كوڭىل ءبولىندى. گازەتتە بۇل تاقىرىپقا قانشا ماتەريال جاريالانعانى جونىندە اي سايىن، توقسان سايىن جوعارى جاق مالىمەت سۇرايتىن. مۇنداي تاقىرىپقا كەز كەلگەن ادام بارا بەرمەيدى، ەشتەڭە جاريالانبادى دەۋگە تاعى بولمايتىنى ءسىرا، بەلگىلى. بۇل ورايدا "ابىرويدى جاپقان" ماڭعىستاۋلىق قالامگەر ءازىربايجان قوناربايەۆ بولدى. "سەمىز" كونۆەرتتەر كەلەدى. ءىشىن اشساڭ، سول كەزەڭنىڭ تىنىسىن ءدوپ باسقان سان الۋان تاقىرىپتاعى ماقالالار. ازەكەڭنىڭ ءوزىن كورمەسەك تە، گازەتىمىزدە ماتەريالدارى ۇستى-ۇستىنە شىعاتىن. اسىرەسە، اتەيستىك تاقىرىپتاعىلارى قامشى سالدىرمايتىن.

بىردە اشحابادتا اتەيست-لەكتورلاردىڭ رەسپۋبليكالىق كونفەرەنسياسى وتەتىن بولدى. وبكوم اۋدان، قالالاردان وعان قاتىساتىنداردىڭ ءتىزىمىن الىپ، ەكشەپ، ساراپقا سالا باستايدى. ءبىزدىڭ اۋپارتكومنان تۇسكەن تىزىمدەگى ادامدارعا قاناعاتتانباعان وبكومنىڭ ناسيحات جانە ۇگىت بولىمىنەن قايتا تەلەفون شالاتىن كورىنەدى:

— مۇندا بەلگىلى اتەيست-لەكتورلاردان ەشكىم جوق، بەلگىسىز بىرەۋلەردى جازعاندارىڭىز قالاي؟

— ءبىزدىڭ اۋداندىق پارتيا كوميتەتىنىڭ اتەيست-لەكتورلارى وسىلار. سەمينار، كۋرستارعا بارىپ، لەكسيامەن ەل اراسىنا شىعىپ جۇرگەندەردى تۇگەل جازدىق.

— اۋ، بۇلارىڭىزدى ءبىز بىلمەيمىز. اتەيستىك تاقىرىپتا "جۇمىسشى" گازەتىندە ۇنەمى كورىنىپ جۇرگەن ءازىربايجان قوناربايەۆ بار ەمەس پە؟..

سوندا بىزدەگىلەر نە ايتارىن بىلمەي، ءتىلىن تىستەپتى. "قۇپ بولادى" دەۋگە ازەكەڭ الىستا، باسقا رەسپۋبليكادا... ماڭعىستاۋدا.. ."ول مۇندا جوق" دەۋگە تاعى بولمايدى. اقىلداسا كەلىپ، وبكومعا حابارلايدى.

— سىزدەر ايتقان قوناربايەۆ بارا المايدى. ونىڭ ورنىنا باسقا جۋرناليست باراتىن بولدى. ول — تەمىر مىڭجاس دەگەن...ءسويتىپ، اتەيست-لەكتور قوناربايەۆتىڭ ورنىنا رەسپۋبليكا استاناسىندا وتەتىن جينالىسقا مەن بارعان ەدىم. كەيىننەن بۇل وقيعانى ازەكەڭە ايتقانىمدا، ىشەك-سىلەسى قاتىپ كۇلدى. ءقازىر دە كەيدە كەزدەسە قالعاندا ەسكە الىپ قويامىز.

---