كسرو حالىق ءارتىسى اللا پۋگاچوۆا ساحناعا قايتا ورالۋ مۇمكىندىگىن جوققا شىعارمادى. ءانشى ءان ايتۋعا، شىعارماشىلىق كەشتەر وتكىزۋگە دايىن، ءبىراق ازىرگە بۇل ءۇشىن قولايلى ءسات تۋعانىن سەزبەيدى، دەپ infohub.kz سايتى حابارلايدى.
77 جاستاعى ءارتىس Laima Rendezvous Jūrmala 2026 فەستيۆالىندە ماكسيم گالكينمەن بىرگە كورىنگەن. اڭگىمەلەسۋدىڭ جازباسىن لاتۆيالىق LSM4 مۋلتيمەديالىق جوباسى جاريالادى. «قۇدايىم-اي. نەگىزى، مەن ءان ايتۋعا دا، اڭگىمەلەۋگە دە، بارىنە دايىنمىن. ءبىراق ازىرگە جان-دۇنيەم مەن ۋاقىتتىڭ سونداي كۇيىن كورىپ تۇرعان جوقپىن. سونى سەزىسىمەن، شىعامىن. 90-دا دا شىعا الامىن. جاقسى بولار ەدى»، — دەپ كەلتىرەدى باسىلىم پۋگاچوۆانىڭ ءسوزىن.
ۋكراينالىق جۋرناليستەرمەن اڭگىمەسىندە ءانشى كيەۆكە شاقىرسا، بارۋعا دايىن ەكەنىن ايتتى. بۇل تۋرالى ۋنيان باسىلىمى حابارلادى. «سىزدەر بىلەسىزدەر، ءبىز سىزدەردى قولدايمىز... تەزىرەك سول جاقتا. شاقىرىڭىزدار — بىرگە ءان ايتامىز. تەك بەيبىت اسپان استىندا عانا، وتىنەمىن»، — دەدى ءارتىس.
پۋگاچوۆا تاياقپەن كورىنۋىنىڭ سەبەبىن دە ءتۇسىندىردى. ول قۇلاعاننان كەيىن اۋىر جاراقات الىپ، ءتورت اي بويى قوزعالا الماي قالعان: اياعى مەن جامباس بۋىنىن سىندىرعان. «بۇل بەينە ەمەس. ەشكىمگە ەشتەڭە ايتپادىم. مەن ءتورت اي قوزعالماي جاتتىم. سەبەبى قۇلادىم. قىسقاسى، اياعىمدى جانە جامباس بۋىنىمدى سىندىردىم. شىنىن ايتسام، مۇلدە تۇرامىن دەپ ويلامادىم. پانيكالىق شابۋىلدار بولدى، وتە جامان بولدى»، — دەدى پۋگاچوۆا.
ءانشى قالپىنا كەلۋ جالعاسىپ جاتقانىن ايتتى. دارىگەرلەر ونىڭ التى ايعا دەيىن قوزعالماي قالۋى مۇمكىن ەكەنىن ەسكەرتكەن، ءبىراق ءارتىس اۋىرسىنۋدى جەڭىپ، بىرتىندەپ قالىپتى ومىرگە ورالا باستاعان. رەسەيدەن تىس ءومىر تۋرالى ايتا كەلە، پۋگاچوۆا ءوزى ءۇشىن ەڭ باستى قولداۋ كوزى وتباسى ەكەنىن اتاپ ءوتتى: «ماعان ءبارى جەتكىلىكتى. رەسەيدە دە، مۇندا دا، كەز كەلگەن جەردە دە. ويتكەنى ءبىز بىرگەمىز. وتباسى. وتباسى قايدا بولسا، ءبارى سوندا، تۇسىنەسىز بە؟ وتباسىندا ءبارى جاقسى بولسا، سەن كەز كەلگەن ەلدە، كەز كەلگەن جاعدايدا، قارجىلىق نەمەسە مورالدىق، ءارقاشان كۇش تاباسىڭ».