2026 جىلعى 3 قىركۇيەكتەن باستاپ قازاقستانعا شەتەلدەن الما اكەلۋگە تىيىم سالىندى. بۇل شەكتەۋ 2026 جىلعى 31 جەلتوقسانعا دەيىن جالعاسادى. تىيىم ءۇشىنشى ەلدەردەن جانە ەۋرازيالىق ەكونوميكالىق وداققا (ەاەو) مۇشە مەملەكەتتەردەن بارلىق كولىك تۇرىمەن جۇزەگە اسىرىلاتىن جەتكىزىلىمدەرگە قولدانىلادى، دەپ حابارلايدى infohub.kz.
اۋىل شارۋاشىلىعى ءمينيسترى مىندەتىن اتقارۋشىنىڭ ءتيىستى بۇيرىعى 3 قىركۇيەكتە «پاراگراف» اقپاراتتىق جۇيەسىندە جاريالاندى. قۇجاتتا ءبىرقاتار ەرەكشەلىكتەر قاراستىرىلعان. اتاپ ايتقاندا، تىيىم قازاقستان اۋماعى ارقىلى وتەتىن ترانزيتتىك تاسىمالدارعا، ونىڭ ىشىندە ەاەو-نىڭ ءبىر مەملەكەتىنەن ەكىنشىسىنە رەسپۋبليكا ارقىلى تاۋارلاردى جەتكىزۋگە قاتىستى ەمەس، ەگەر سوڭعى مەجەلى پۋنكت قازاقستان اۋماعى بولماسا.
سونىمەن قاتار، شەكتەۋ 3 قىركۇيەككە دەيىن ەلدەن ەكسپورتتىق كەدەندىك راسىمدەۋدەن وتكەن المالارعا قولدانىلمايدى، ەگەر ەكسپورتتىق دەكلاراسيا جانە جۇكتىڭ كورسەتىلگەن كۇنگە دەيىن جونەلتىلگەنىن راستايتىن كولىك قۇجاتتارى بولسا. كەدەندىك ترانزيت رەجيمىندە تاسىمالداناتىن تاۋارلار ءۇشىن ترانزيتتىك دەكلاراسيا تالاپ ەتىلەدى.
ەسكە سالايىق، بۇعان دەيىن اۋىل شارۋاشىلىعى مينيسترلىگى قازاقستانعا الما اكەلۋگە ۋاقىتشا تىيىم سالۋدى ۇسىنعان بولاتىن. باستاپقىدا شەكتەۋدى 1 تامىزدان باستاپ 2026 جىلدىڭ سوڭىنا دەيىن ەنگىزۋ جوسپارلانعان ەدى.